Shillong, Nailur 06 : Ki Pulit ka East Khasi Hills kila rai ban thwet ha ban da shem ia ki briew kiba donkti ban kawang petrol bomb bad thmu wiang ding ia ki Police Station.
Ka Jylla kala sakhi ia ka jingshah hiar thma man ka por jong ki Police Station mynta u snem bad ka jnghiar thma ba khatduh eh ka dei kaba dang shu jia dang ha kine ki khyndiat sngi ha Rynjah Police Station.
Ka Mawlai Police Station, Sadar Police Station bad Laitumkhrah Police Station kila shah pynkylla sohpdung ha ki runar ha ki bnai Iaiong-Jymmang.
Haba kylli, u Superintendent of Police ka East Khasi Hills Bah Sylvester Nongtnger ula ong ba halor ka jingkawang petrol bomb ha Rynjah Police Station, ki Pulit kila register ia ka case bad ka jingtohkit kala iaid shaid shaid haba kular “Khlem pep, ngin sa ioh kem ia kiba donkti”.
U pyntip ba ki Pulit kila shim iaki sienjam ba tyngeh pyrshah ia ki jingshah hiar thma ki Police Station.
“Ha ka Laitumkhrah PS case, ki runar ki dang don ha along ha kine ki 4-5 bnai” ong u SP haba phah ia ka khubor kaba tyngeh “Kat kiba leh iakane ka kam bymman, ki Pulit kin leh tyngeh ia ki. Ngi lah ban nym ioh ia phi mynta bad ngi lah ban nym ioh lashai hynrei manla ka sngi ngin iai thwet ia phi”.
“Kum ki Pulit, ngi hap ban leh iala ka jong ka kamram. Kat kiba leh ia ki kam bymman, ngin thwet beit ia ki” ula bynrap.
U Bah Nongtnger ula pyntip ruh ba ka Tnad kala pyrkhat kam ban pyndait noh ia ki kor CCTV ha manla ki Police Station kum ka kam kaba hakhmat duh.
