Shillong, Risaw 19: Ki Autonomous District Council (ADC) ka Meghalaya ba kynthup ka Khasi Hills Autonomous District Council (KHADC), Garo Hills Autonomous District Council bad ka Jaintia Hills Autonomous District Council (JHADC) hynne ka sngi Palei, kila shim iaka rai ban pyntreikam noh iaka Digital India Land Record Modernization Programme (DIRLMP).
Ia kane ka rai la shim haka jingialang hapoh ka ophis treikam jong ka tnat Land Resources jong ka Ministry of Rural Development ka Sorkar Pdeng ha nongbah New Delhi.
Ia kane ka jingialang la pynlong naka bynta ban buddien iaka jingialang bala pynlong haka 3-4 tarik Jymmang 2023 halor ka Riti dustur, ki ain tynrai, ki ain ba mynta bad ki sienjam ba ki district council ki shim.
Kum shi bynta ban buddien ia kane ka jingialang, u Executive Member (EM) ka KHADC ba khmih iaka land bah Teibor Pathaw ula lum iaki dkhot ban kynduh ia u Joint Secretary ka tnat Land Resources jong ka Ministry of Rural Development ka sorkar pdeng haka 10 Nailar 2023 bad ha kane ka jingiakynduh la ai jingmut ban pyntreikam iaka DIRLMP.
La bthah ruh iaki ADC ba kin iatreilang bad ka tnat Directorate of Land Records, Shillong ha ka ban pynbiang iaka jing tyrwa bad ban aiti shaka sorkar jylla lyngba ka District Council Affairs (DCA) bad shaka tnat Planning ban ioh jingmynjur.
U Secretary ka Ministry of Rural Development Ajay Tirkey ula kyntu iaki jylla ka thain shathei lammihngi (North East) ba kin pynsted ha ka ban treikam lyngba ki kor Computer.
Ula pyntip ba haduh 95% ki jaka ki dei kiba la pynrung ha ki kor computer (digitalized) hynrei ka 5% kaba sah ka dei ha ka thain Shatei Lam Mihngi ka Ri. Ula pynpaw ia ka jingdonkam ba ki ADC jong ka thain kin jam lang ha kane ka lynti ban don noh ia ka rukom khmih ia ki jaka puta kat kum kane ka juk ba mynta.
Naka liang u dkhot ka GHADC kila pynpaw ia ka jingdonkam ban pynsngewthuh paidbah haba iadei bad ka jingbuh jingthoh noh ha ki kor digital ia ki jaka puta.
Naka liang ki dkhot ka JHADC kila pyntip baka district council kala iaid shakhmat ban lum jingtip iaki jaka puta lyngba ki kor GPS Technology.
Naka liang u EM ka KHADC ula pyntip baka district council ka long kaba la pynkhreh ban pyntreikam iaka DILRMP namar iaka jinglum jingtip halor ki jaka puta la bsuh lang hapoh ka Khasi Hills Autonomous District (Regulation and Administration of Land) Act 2021.
