Shillong, Naitung 24 : Ka kynhun ki 8 tylli ki Sengbhalang ba iakhun pyrshah ia ka jingrung kyrthep ki bar jylla, kila rai ban iarap ia ka Sorkar Jylla ha kaban pyntreikam ia ka Meghalaya Residents Safety and Security Act (MRSSA), 2016 da kaba pynlong ia ki jingkhynra ia ki bar jylla ba khlem kot khlem sla ha kylleng ki jaka ka Ri-lum Khasi, Jaintia bad Garo.
Kane ka dei ka dei kaba mih na ka jingialang jong kine ki phra tylli ki Seng ba kynthup ia ka Khasi Students’ Union (KSU), Federation of Khasi Jaintia and Garo People (FKJGP), Hynniewtrep National Youth Front (HNYF), Ri Bhoi Youth Federation (RBYF), Jaintia Students’ Union (JSU), Garo Students’ Union (GSU), Achik Youth Welfare Organization (AYWO) bad Federation for Achik Freedom (FAF) – kaba long hynne ka sngi Balang ha Ophis treikam ka FKJGP ha Mawlai.
Ha ka jingialang, u President ka KSU Lambokstar Marngar ula ong “Ngi la iarai lang ban iarap ia ka Sorkar Jylla, kaba I kum kaba iakynduh ia ka jingeh na ka jingduna briew – ban pyntreikam noh mardor ia ka MRSSA, 2016. Kumta ha ki sngi ban wan, ki kynhun sengbhalang kin pynlong ia ka jingkhynra ia ki bar jylla ba khlem kot khlem sla ha baroh kawei ka Jylla”.
“Ka Sorkar Jylla kala ialehkai bad ka kam jingrung ki mynder bad namar kane, ngin sa iarap noh ia ka Sorkar ba kan lah pyntreikam pura ia ka MRSSA kumba ka long da kaba pynkhlain ne pynjur ia ka jingtalasi pyrshah ia ka jingrung jingmih beain ha Jylla” ula ong.
U Bah Lambokstar ula pynkynmaw ba ka MRSSA ka dei kaba la mynjur da ka Sorkar Jylla naduh u snem 2016 bad ong “Ia ka MRSSA la thaw namar ka Sorkar kala kren shai ba ka ILP ka dei ka mat jong ka Sorkar Pdeng hynrei sngewsih b aka Sorkar kan dang ban pyntreikam ia kane ka ain ba kongsan”.
Ula ong ba ka jingkem ba dang shen jong u Myntri Rangbah ka Jylla Conrad K Sangma ba la pyntreikam ia ka MRSSA ha ka Jylla ka dei tang ka “Jingkren ha ki lad pathai khubor” namar ym shym la iohi dak satia kan don ka jingpyntreikam sha madan.
“U Myntri Rangbah ula kren halor ka District Task Force (DTF) hynrei ki Nongmihkhmat jong ki Shnong, kiba iashimbynta ha ki jingialang bala khot da ki Deputy Commissioner, kila pyntip ba ka jingialang ka dei tang ka jingiasyllok ban pyntreikam ia ka MRSSA. Haba ngi pan jingtip ia ka jinglong ka MRSSA ha ka jingiakynduh ba dang shen, u Myntri Rangbah ula ong ba ka Sorkar ka dang bishar bad ka dang pyrshang ban wanrah ia ki jingpynpynkylla ha u 2020 hynrei kane kala poi pynban sha ka jingbishar jong ka Sorkar Pdeng. Kumjuh ruh ha ka jingialang, u Myntri Rangbah ula pyntipba kane ka kam ka dang don hapdeng ka jingbishar katba hakhmat ki lad pathai khubor, ula kam ba ka Sorkar kala pyntrei ia ka MRSSA. Ngim tip shuh kano kaba dei” ula ong.
“Ngi pynkynmaw ruh ia ka Sorkar halor ka Resolution bala mynjur da ka Assembly ha ka 19 tarik Nohprah 2019, ba kyrpad ia ka Sorkar Pdeng ban pyntrreikam ia ka Inner Line Permit ha Meghalaya. Ha ka por ba wan u Myntri Kam Pohiing ka Ri ha Jylla, ym shym la mih kawei ruh ka kyntien halor ka ILP. Haba ngi kylli na ka Sorkar Jylla, ka jubab ka ong ba ka kam ka dang don hapdeng ka jingbishar. Da shisha ngim lah sngewthuh hangno ba ka Sorkar ka pyrshang ban wad ia ka lynti ban weng ia ka jingeh halor ka jingrung kyrthep ki mynder. Kumta, kum ki Sengbhalang, ngi la kut jingmut ban pynjur ia ka jingtalasi pyrshah ia ki bar jylla ba wan rung beain bad khlem kot khlem sla ha baroh kawei ka Jylla” ula bynrap.
Nalor kane, u President ka HYNF Bah Sadon K Blah ula kynnoh ba ka Sorkar kala babe ba ka mynjur ia ka MRSSA namar kala ktah ia ka “Vote Bank” jong ka.
Haba pynpaw ba ka Entry-Exit Point bad ki District Task Force (DTF) ki dei ki mat ba kongsan eh jong ka MRSSA, ula ong “Haba iadei bad ka Entry-Exit Point, ka Sorkar kala khot ia ka jingialang la bunsien bad ki Sengbhalang bad batai ruh halor ka Impact Assessment, ka jingthied jaka bad ong ba kam da don jingeh than haba phai sha ka kam thied jaka. Ka Sorkar kala kular ba ka jingthied jaka ha Ri-lum Garo kala dep bad ka kam ba thied jaka ka dang iaid ha Ri-um Khasi Jaintia bad ba kala pyndep ruh ia ka Impact Assessment hynrei haduh mynta ka Sorkar kala shukor ba ka Covid Checking Point ka dei ka Entry-Exit Point”.
Haba kynnoh ba ka Sorkar kala thok bad pynbiej ia ki Nongialam jong ki Sengbhalang bad ki paidbah ka Jylla, une u President ka HNYF ula ong “Ki daw bala ai hi ka long ba ka Sorkar kam lah ban pyntreikam ia ka MRSSA naba ki dang pynkylla thymmai ia ka Act. Kaba thamula ka long, ym pat don shisngi ruh ban pyntreikam iaka MRSSA, 2016 hynrei kila wanrah da ka Amendment”.
“Lada ka Amendment ka dang shimpor, ka Sorkar ka dei ban pyntreikam shuwa ia ka MRSSA 2016 lada ka shimkhia shisha ban tehlakam ia ka jingrung kyrthep ki bar jylla shapoh ka Jylla” ula ong bad bynrap “ Nga mynjur ba ka Sorkar imat kam don briew ban pyntrei ia ka MRSSA. Kumta, ngim don lynti da kumwei pat hynrei ban iarap ia ka Sorkar ba kan pyntrei ia ka MRSSA khnang ban lah pyrrkhing ia ka jingrung kyrthep ki bar jylla sha Jylla”.
