Shillong, Iaiong 10 : Ka Sorkar Meghalaya Democratic Alliance (MDA)-2 ba ialam da ka National People’s Party (NPP) kala rai ban sa rah iakren bad shim rai halor ka jingpyntreikam ia ka Roster System ha ka jingialang ban wan jong ka Kynhun Myntri.
Kane kala mih hadien ka jingjur ka jingdawa ban pynlong ia ka Dorbar Kyrpang jong ka Iingdorbar Thaw Ain ka Jylla na ka bynta ban iakren halor ka kam ba iadei bad ka Roster System bad ka State Reservation Policy, kaba la mih ruh na ka hukum ba dang shen jong ka Iingkashari Meghalaya High Court.
Haba iakren bad ki nongthoh khubor, u Symbud Myntri Rangbah ka Jylla Bah Prestone Tynsong ula pynpaw ba um iohi satia ia ka jingdonkam ban khot ia ka Dorbar Kyrpang halor kane ka kam.
“Hynrei, ngam ong satia ia kane mynta. Ynda u Myntri Rangbah ula wan phai sha Shillong, ngi la don jingthmu ban khot ia ka All Party Meeting (jingialang jong baroh ki seng sain pyrthei). Ngi kwah ban lum shuwa ia ka jingialang ka MDA bad ngin don ka jingiakren ba sani ha ka Kynhun Myntri bad hadien ngin sa shim rai lehse ban khot ia ka All Party Meeting ha kaba ngin lah ban iasam jingtip bad iakren ia kiei kiei baroh bad ki seng sain pyrthei” ula ong.
Haba kylli, u Bah Prestone ula ong “ Ka khana ka long kaba jrong bha. Ai ngan iathuh ia phi kawei, ngi la dep file ia ka affidavit haduh laisien bad ha katei ka por ka Iingkashari Meghalaya High Court (ha ka hukum ba hashuwa) kala ong ba phi hap ban pyntreikam ia ka Roster System naduh u snem 1972. Kala kren shai ba kan long naduh ba sdang treikam ka Reservation Policy kaba mut ba ngi hap ban phai dien biang sha u snem 1972”.
“Hynrei da ka hukum ba pynmih khadduh jong ka Iingkashari, ngin sa shong biang, ngin sa iakren ha ka Kynhun Myntri, ngin sa iakren ha ka MDA bad hadien ngi lah ban khot wat ia ka All Party Meeing” ula bynrap.
