Tura, Iaiong 27 : U Myntri Rangbah ka jylla Conrad K Sangma hynne ka sngi Palei, ula pynbna ba ka Sorkar MDA-2 jong u, kala rai ban kynthup lang noh ia ka Happiness Index (ka thup jingkmen) ha ka Mang tyngka ka Jylla na ka bynta ki san snem ban wan, ka ban pynthikna ba ka jingkmen (happinesss) jong ki paidbah kan dei shibynta jong ka synshar khaddar.
U Myntri Rangbah ula pynbna ia kane ka rai ha ka jingialang pynkup burom ia u bad ia u Lamphang ka Iingdorbar Thaw Ain, kaba long hynne ka sngi ha Tura District Auditorium.
Kane ka jingpynkup burom ka dei kaba la pynlong da ka NPP ka Ri-lum Garo halor ka jingioh wanphai biang jong ka party sha ka bor synshar ha Jylla.
“Ngi hap ban shim ia ka jingkmen jong u paidbah haba pyniaid ia ka synshar khaddar ha Jylla. Ngi donkam ban peit la ki kam ban kyntiew ia ka ioh ka kot ka iahap ne em bad ka jingkmen bad ka jinghun jong u paidbah. Ka Sorkar bad ka synshar khaddar ka dei ban kynthup ia ka jingiashimbynta lang ki paidbah” ong u Conrad.
Pule lang ia kane: Ujor ka NHPF ia ki arngut ki nong Assam ba kynnoh thok pisa ia ki paidbah
Ula pynpaw ruh ba ha ka por ba ka Sorkar jong u ka wanrah ia kane ka jingthmu ban kynthup ia ka Happiness Index, kiba bun kila kulmar jingmut bad kylli ia u.
“Ki kylli ia kaei ka jingmut bad kan leh aiu kane?. Nga iathuh ha ki tang kawei-Ka jingkmen ka dei ban wan na mynsiem ym na shabar. Lada ki paidbah ki hun bad ka synshar ka khadar, ka mut ba ki iakmen” ula ong.
U Myntri Rangbah ula iai ban ia ka jingkut jingmut jong ka Sorkar ba ka synshar khadar bad ka sorkar ki dei ban iaid lang ha kti ha kjat da ka jingiashimbynta lang jong ki paidbah bad dei namar kata ba la kynthup lang ia ka Happiness Index ha ka mang tyngka ka Jylla naduh mynta u snem.
Lah ban kdew hangne ba ka Mizoram ka dei ka Jylla ba dap da ka jingkmen eh ha India, ka Kanpur ka Sor ba dap da ka jingkmen eh hapoh ka Ri bad ka Finlang ha Europe ka dei ka Ri ba dap da ka jingkmen eh ha ka pyrthei.
Pule lang ia kane: Dawa ka KSU ban weng noh ia ki shipai BSF na shnong Amlarem
