Shillong, K’lyngkot 11 : Ka Sorkar Jylla kala rai ban wanrah noh da ka State Tourism Policy ba thymmai hadien 11 snem ba treikam ka policy kaba rim.
Ia kane ka Tourism Policy, kaba thmu ban ai kamai jakpoh ba shirta ia ki paidbah, ka dei kaba la mynjur da ka Kynhun Myntri kaba la shong jingialang hynne ka sngi Balang.
Cabinet today approved the Meghalaya Tourism Policy 2023. The Tourism Policy will give shape and structure to adapt to the necessary changes required to boost the sector & will also look into aspects of sustainability.@kishanreddybjp pic.twitter.com/XMEQTzJv1L
— Conrad Sangma (@SangmaConrad) January 11, 2023
Haba iakren bad ki lad pathai khubor, u Myntri Rangbah Conrad K Sangma ula ong ba ka Tourism Policy kaba rim ka dei kaba la wanrah ha u 2011 bad namar ki jingkylla ha ka kam jngohkai, la sngew donkam ban pynjanai bad pynkylla ia ka policy kat kum ka jinglong jingman ba mynta.
“Ka jingthmu haba thaw ia ka Tourism Policy ka long ruh ban pynwandur bad ohdur bha na ka bynta baroh ki kam jngoh kai haba buh ha ka jingmut jingpyrkhat ia ka jinglong jingman mynta ha kane ka kam” ula ong.
U Myntri Rangbah ula bynrap ba shibun kiei kiei kila jia ha ka kam jngohkai hynrei kim shym la iaid kat kum ka lynti ne ka rukom kaba dei. “Namar kata, kane ka policy ka dei kaba thmu ban pynwandur bha ia ki kam ki jam kat kum ka jingkwah baka kam jngohkai kan kiew bad kaba lah ban pynneh pynsah”.
U Conrad ula ong “Ka Policy kan khmih kumno ba ngin pynlong ia ka kam kaba ai kamai…kumno ban pynthikna ia ka jingai kam aijam bad ban pynmih ia ki nongsengkam bad ban pynthikna ruh ba ki trai shnong kin iadonbynta lang ha baroh ki kam ki jam…kumno ki shnong kin iadon bynta, kumno ban pyndonkam ia ki kor ki bor ban kyntiew ia ka kam jngohkai ha ka lynti kaba biang eh bad ruh ba kumno ki tnad bapher bapher kin iatreilang”.
U Myntri Rangbah u ong ba kane ka Policy ka kren ruh halor ka jingshngain jong ki nongshangkai pyrthei kiba wan kai sha Jylla. Kat kum ka jingong jong u, ka Sorkar kan sa ai da ki syrnot na ka bynta ka Homestay khnang ba kan pynheh mynsiem hapdeng ki nongshangkai ki ban wan sah ha kine ki jaka.
Haba kylli, u Myntri Rangbah ula ong ba ka thong jong ka Sorkar ka long ban kyntiew ia ka jingnoh synniang jong ki kam jngohkai sha ka GDP jong ka Jylla. Kat kum ka jingong jong u, ka jingsynniang jong ka kam jngohkai ia mynta sha ka GDP ka Jylla ka long hapoh ka 10%.
Halor ka jingbret jakhlia jong ki nongshangkai pyrthei ha ki jaka shangkai kum ka Sohra bad kiwei kiwei ki jaka, u Myntri Rangbah ula ong ba kane ka Policy kala pruid dak ruh halor ka kam ba iadei bad ka jingbret jakhlia. U pyntip b aka kyndon kala don pyrshah ia ka jingbret jakhlia pathar bad ba kumno ki shnong ki thaw kin iadonbynta halor kane ka kam.
