Shillong, Naitung 18 : U Symbud Myntri Rangbah ba khmih ia ka kam Pohiing (Police) Bah Prestone Tynsong ha ka sngi Thohdieng, ula iai ban ia ka rai jong ka Sorkar Jylla ba kan kyrpad ia ka Sorkar Assam ba kan pynphai biang noh ia ka Block-I bad II sha Meghalaya.
U Bah Prestone, uba dei ruh u Chairman ka Regional Committee, u dang ap ia ka jubab na ka Committee ka Assam ban pynlong ia ka jingiajurip lang ia ki jaka khappud.
Haba kren sha ki lad pathai khubor, u Symbud Myntri Rangbah ula pynpaw ia ka jinglong ba kloi ban pynlong ia ka jingiajurip lang ia ki jaka khappud ha kano kano ka por, lehse hadien ka lyiur.
“Nga dang ban ioh ia ka tarik na ka Committee ka Assam namar ha Ri-Bhoi, ngi don ar-lai ngut ki Chairmen na Assam katba nga ngi, nga dei tang ma nga u Chairmen. Kumta, nga dang ap ia ka tarik ba kin buh ma ki. Ha kajuh ka por, ka elekshon jong ki kan long ha u snem ban wan, ngam tip la ki lah ne em ban ai ia ka por ba kordor jong ngi ha ka ban iajurip lang bad ia kane, nga dang ap ia ka jubab na ki” ula ong.
“Na ka liang jong ngi hi ngi la long kiba kloi. Ha ka jingshisha, ngi kwah ba ka jingjurip kan long ha kano kano ka por. Hooid, ha ka por lyiur ngi don khyndiat ki jingeh hynrei shuwa ban kut u Nailur bad hadien ba kut ka lyiur, nga tharai ba wat na ka liang ka Assam kila long kiba kloi ban iajurip” ula bynrap.
Haba kylli, u Symbud Myntri Rangbah ula kren halor ka jingpynbna u snem 1950, kaba kren halor ka jingrah ia ki katto katne ki jaka na Meghalaya sha Karbi Anglong. U ong ba kane ka kam mynta ka iaid tawiar halor ka jingpynphai biang ia ka Block-I bad II sha Meghalaya.
“…na ka liang ka Sorkar, kaei kaba ngi kwah ka long ban kyrpad ia ka Sorkar Assam ba kan pynphai noh ia ka Block-I bad II sha Meghalaya. Nga tharai kane ka dei ka kam ba hakhmat kaba ngin iakren”.
Ha kajuh ka por, u Bah Prestone ula ban jur ia ka jingdonkam na baroh arliang khappud ba kin bat ia ka soskular status quo bad ban wanrah ia ka jinglong jingman ba jai jai khnang ban lah pynbeit ia ka jingiakajia pud.
Ula kyntu ia ki nongshongshnong na baroh arliang ba kin bat ia ka jingshongsuk shongsain, haba kdew ba ka jingiakajia pud ka dei kaba la iaid pateng la pateng.
Kat kum ka jingong jong u, kane ka kam ka dei kaba lah ban pynbeit tang da ka jingiajurip lang bad ka jingiakren hapdeng ki Committee, bala ialam da ki Myntri Rangbah na baroh arjylla.
“Ka jingeh ki kan iai bteng tad haduh ba ki Committee kila iashong bad iakren halor kine ki jingeh hynrei ka jingkyrpad jong ngi ia baroh arliang la ka dei ia kiba na Assam ne Meghalaya ba sngewbha ban bat ia ka status quo” ula ong.
 Bah Prestone Tynsong ha ka sngi Thohdieng, ula iai ban ia ka rai jong ka Sorkar Jylla ba kan kyrpad ia ka Sorkar Assam ba kan pynphai biang noh ia ka Block-I bad II sha Meghalaya.){kind=link}