Shillong, Jylliew 12 : Ka Sorkar Jylla kala rai ban leit buddien biang bad ka Sorkar Pdeng ba kan pyntreikam noh mardor ia ka Inner Line Permit (ILP) bad ban nang pynkhlain ia ka Meghalaya Residents, Safety and Security Act (MRSSA), 2016, ban pynthikna ia ka jingpynrung kyrteng thik ba thik ia ki briew kiba wan na shabar shapoh ka Jylla.
Ia kane ka rai la shim hadien ka jinglah sei madan ia ki jingshisha halor ka jingshah pyniap u nongwan shangkai na Indore, Madhya Pradesh, Raja raghuvanshi, uba wan leh honeymoon bad ka kurim ha Sohra-ka jaka ba pawnam ha ka jingdon ia ki jaka jngohkai ba itynnad ha Jylla.
Kane ka jingjia kala lam sha ka jingjur ki jingdawa ban pyntreikam noh mardor ia ka Inner Line Permit (ILP) bad MRSSA ban pynthikna ia ka jingshngain bad ka jingiada ia ki nongshongshnong ka Jylla bad ki briew kiba wan sha Jylla.
Haba kren ia ki nongthoh khubor, u Symbud Myntri Rangbah Bah Prestone Tynsong ula kular ba ka Sorkar Jylla kan pynjur ia ka jingbuddien ia ka jingdawa pyntreikam ia ka ILP bad ka Sorkar India.
“Nga thikna ba u Myntri Rangbah shen un sa rah iakren ia kane ka kam bad ka Ministry of Home Affairs (MHA)khamtam haba khmih ia kane ka jingjia kaba la jia ha Jylla” ula ong.
Nalor kane, u Bah Prestone ula ong ba ka Sorkar Jylla kala rai ban nang pynkhlain ia ki ain kiba la don lypa ha ka kyrteng jong ka MRSSA 2016 bad bynrap “Ngi dang don ki lad ban pynkhlain ia ka MRSSA bad ban pynkylla mardor ia ka”.
Haba kylli, u Symbud Myntri Rangbah ula kubor ba lada pyntreikam ia ka MRSSA kumba ka long, ka lah ban dei ka lad jingiada kaba khlain ia ki briew kiba pyrshang ban pynlong ia ka Meghalaya kum ka jaka ban wan leh ia ki kam bymman.
“Lada phi peit biang ia ka MRSSA kaba mynta, ngi la dep ai ia ki jingbthah bad ngi la thep ruh ia ki kyndon ha kaba ki trai jaka,la ki dei ki trai hotel, kitrai homestay, ki nongaiwai iing-ki donkam ban ai jingtip mardor haba don kino kino ki briew ba wan sah ha ki iing jong ki, ki hap ban pynbor ia ki briew ba wan sah la ka dei shisngi lane shibnai lane ar-lai bnai, ba ki dei ban pynrung kyrteng ialade. Kane ka deika MRSSA kaba long mynta hynrei, ngi kwah ban nang pynkhlain shuh shuh ia ka” ula ong.
U Bah Prestone ula pynkynmaw ruh ba ki don ki District Task Force (DTF) bala khlieh da ki Deputy Commissioner ha man ki District ban pynthikna ia ka jingpyntreikam pura ia ka MRSSA.
“Ka dei ka kam kaba iai bteng hynrei hateng hateng ki briew jong ngi ki klet ia kata. Mynta ynsa la jia kane ka jingjia ba sngewsih, ngi sdang sngewthuh ba ngi hap leh ia ka. Ngan iathuh ha phi kawei ba ka Sorkar Jylla ha kine ki khyndiat sngi ban wan, kan sa pynmih ia ki jingbthah, ki Standard Operating Procedure (SOP) ia baroh ki kynhun ba iadon bynta ba kin talasi ym tang ha ki rud surok hynrei khamtam eh ba talasi ha ki hotel lane homestay” ula ong haba bynrap “Lada ngi lah ban pyntreikam ia ki SOP ba pynmih da ka Sorkar bad ki DTF ha man ki District, nga thikna ba ki trai jaka, nongaiwai iing, ki trai homestay lane hotel ki hap ban lum ia ki jingtip ba bniah ia ki nongwan shangkai lane ki briew ba nabar naba ha ka MRSSA, ha ka khyllipmat ba ki lum ia ki jingtip ba lum kyrteng, kine ki trai kin hap phah ia ki jingtip sha ki Police Station ba marjan ne Police Outpost kat kaba ki sngewjan”.
Haba kylli,u Bah Prestone ula ong “ Ka (MRSSA) ka dei tang kawei ka lad kaba ngi don kumta ngi donkam ban nang pynkhlain shuh shuh ia ka. Ym tang katta, ngin sa bthah ruh ia baroh ki DFT ba kin iakren ia ki Khlieh Nongsynshar bad ia baroh ki trai hotel lane homestay bad man ki thliew iing ha ki Shnong ki thae lane ha kano kano ka jaka ha Meghalaya, ba I donkam ban iatreilang bad ka Sorkar. Da kane leh kumta, ngin lah ban pynthikna ba ngi long kiba shngain namar lada don mano mano ba wanrung sha Jylla, tang hapoh 10-15 minit, ngi la ioh jingtip lut shaphang jong ki”.
Halor ka jinglong jingman jong ka Meghalaya Residents, Safety and Security (Amendment) Bill, 2020, u Bah Prestone ula ong b aka Bill ka dang shu sahkut kumta hadien ba ka Ministry of Home Affairs (MHA) kala kyntait ban mynjur ia ka amendment kaba tyrwa ban buh ia ki Facilitaton Centre ha ki Entry bad Exit Point jong ka Jylla.
“Ta ka daw ngi la shong bishar biang ban pynkhlain ia ka Ain kaba la don lypa dakaba weng noh ia ki Facilitation Centre, kaba ngi la dep pynieng bad ka Iingkashari ruh kala phah pynsangeh ia ka” ula ong.
 bad ban nang pynkhlain ia ka Meghalaya Residents, Safety and Security Act (MRSSA), 2016, ban pynthikna ia ka jingpynrung kyrteng thik ba thik ia ki briew kiba wan na shabar shapoh ka Jylla.){kind=link}