Shillong, Jymmang 16 : Ka Sorkar Jylla kala shimkhia halor ka rukom pyniaid ba kynrum kynram ia ka eksam Common University Entrance Test (CUET)-UG-2024 ha NEHU bad rai ban thoh mardor sha ka Sorkar Pdeng ban pyllait noh na ka CUET.
Ki briew jong ka National Testing Agency (NTA) bad ka NEHU kila shah khot hajir ha ka jingialang bala pynlong da u Myntri Rangbah ka Jylla Conrad K Sangma hynne ka sngi Thohdieng.
Ki samla pule kila shah ktah namar ka jinglong jingman kaba mih na ka jingthurmur ka rukom pyniaid ia ka eksam CUET-UG 2024 bala pynlong ha NEHU ha ka sngi Balang.
Haba iakren bad ki nongthoh khubor hadien ka jingialang, u Myntri ka tnad pule puthi Rakkam A Sangma ula ong “U CM ula shimkhia bha halor kane ka jingjia bad ula rai ban sa iakren bad ka Sorkar India bad ka NTA na ka bynta ka jingmyntoi bad ki bha ka miat ki samla pule”.
“Ngin sa thoh na ka bynta kito ki samla pule, kiba iakhun ia ka eksam CUET, ban leit rung klas ha NEHU hi bad ban ailad biang ia ki sa shisen bad ia kito ki samla, kiba iakhun ban ioh rung klas ha ki college ba iasoi bad ka NEHU, ba kin pyllait noh mynta u snem naka CUET” ula ong.
Haba pynpaw ba ka CUET kala kylla long ka ishu hapoh ka Jylla, u Rakkam ula ong “Namar kata, ngi lah wanrah iala ka jong ka State University. Kiba bun ki College kiba iasoh bad ka NEHU, ki lah ban ai rai ban iasoh noh bad ka Captain Williamson Sangma State University”.
U Myntri ka tnad Pule Puthi ula ong ba kam shym la don satia ka jingpynkhreh bad ka jingiatreilang na ka liang ka NTA kaba lam sha ka jingmih ki kynrum kynram haba bynrap ba ka NTA ka khlem kynjoh ktien ia ka Sorkar Jylla kynthup ia ki Deputy Commissioner ban khmih lem ia ka suk ka sain bad ki bor pahara.
“(Hapdeng ka jingialang), ki Heh ka NEHU kila pyntip ia ngi ba dei ha ka khyllipmat ba khatduh, ka NTA kala pyntip ia ki borkhmih ka NEHU ha ka 14 tarik Jymmang por 6 baje janmiet ba ki dei ban long kiba la pynkhreh ia 2000 ngut ki samla pule hynrei ha shiteng miet, ka NTA kala pyntip pat ban long kiba la khreh sa ia kumba 4000 ngut ki samla pule. Kumta ki khlem don por shuh ban pynkhreh namar ka jingbym biang ka jingaiktien na ka NTA” ula ong.
“Ka NTA bad ki heh ka NEHU kila pyntip ia ngi ba tang kawei ka kynthei, kawei ka samla kim shym la lah ban iakhun ia ka eksam CUET hynnin ka sngi. Hynrei, kala don ka jingslem. Ki don katto katne ki jingthut ha ka biometric bad dei hadien ba ai dak ka NTA, kila lah ban pynlong ia ka eksam khlem da pyndonkam shuh ia ki biometric” ula bynrap.
Haba kylli, u Rakkam ula ong “Namar kane ka jinglong jingman, kiba bun ki samla pule kim shym la lah satia ban leh bha. Ngin sa kyrpad ban pyllait biang noh ia ka Meghalaya namar mynta ngim tip shuh ba katno ngut ki samla pule kim shym la ioh ban ialeh ia ka eksam lane kiba la shah ktah namar kane ka kynrum kynram”.
Ula ong ba ka Sorkar Jylla kan sa thoh ruh sha ka NTA ban bthah ba ki dei ban da pynkhreh bha haba pynlong ia kum kine ki eksam kiba kongsan.
Ha kawei pat ka jingkylli, u Myntri ula ong ba ka NTA ka dei ban shim rai halor kine kiei kiei baroh.
-UG-2024 ha NEHU bad rai ban thoh mardor sha ka Sorkar Pdeng ban pyllait noh na ka CUET.){kind=link}