Shillong, Naitung 20 : Ka Sorkar Jylla ha ka sngi Palei kala mynjur ia ka jingtyrwa ban thied ia ka jaka ba 50 acre ha Pung Nongmahir, Ri-Bhoi District na ka bynta ban tei ia ki jingtei kiban kyntiew ia ki kam jngohkai pyrthei.
Ka Sorkar kala shim ia kane ka rai ha ka jingialang jong ka Kynhun Myntri bala pyniaid da u Myntri Rangbah ka Jylla Conrad K Sangma.
Haba iakren bad ki nongthoh khubor, u Myntri Rangbah ula pyntip ba ka Sorkar Jylla kan pynkut haduh T. 10 klur na ka bynta ban thied ia ka jaka ba 50 area ha kane ka pung.
“Ia kane ka leh khnag ban nang kyntiew ia ka jingdon jaka jong ka Sorkar khnang ban lah pyntrei ia ki project kam jngohkai pyrthei” ula ong.
“Bad ngi iatip ruh ba ka thain pung Nongmahir ka dei kaba itynnad bha bad kaba khring bha ia ki kam jngohkai, ta ka daw da ka jingthied ia kane ka jaka, ngin sa lah ban pyntrei ia ki project kam jngohkai ha ka thain” bynrap u Conrad.
Kat kum ka jingong jong u, ka Sorkar kan shna ia ka Resort nalor kiwei kiwei ki kam ba iadei bad ka kam jngohkai pyrthei.
Pule ruh: Pynkha ka UTSM ia ka Dr D.D.Lapang Block ban pynsahnam ia ka kyrteng u Bah Lapang
