Shillong, Jymmang 09 : Ka Sorkar Jylla kala rai ban thaw noh da ka Selection Committee ka ban khlieh da u Chief Secretary, ka ban jied ia ki briew ki ban leit iashimbynta ha ka International lane National Film festival, ka ban pynshong nongrim kat kum ka jingpaw ki kam ba ki trei (merit).
Ia kane ka rai la shim ha ka jingialang bala pynlong da ka Myntri ka Tnad Information & Public Relation Kong Ampareen Lyngdoh bad baroh ki Tnad ba don bynta jong ka Arts & Culture, Information & Public Relation bad ka Tnad Tourism, kaba long hynne ka sngi ba-ar.
Ka Myntri kala lum ruh ia ka jingtip halor ka jinglong jingman kaba mih na ka jingjied ia u Bah Commander Shangpliang bad Nicholas Lemtor Khangkongor ban leit iashimbynta ha ka Cannes Film Festival.
“La ai jingmut ba hadien ka jingbishar ia ka kyrteng u Bah Pradip Kurbah bad Dominic Sangma ba u Dominic Sangma u lah ban shah jied bad ia ka kyrteng jong u ban phah sha ka Ministry of Information & Broadcasting ba un iashimbynta ha Cannes Film Festival bad ki don ruh ki khubor ba u Nicholas Lemtor Kharkongor u lah ban weng noh ia ka jingleit iashimbynta ha kane ka tamasa” pyntip u Pravin Bakshi Commissioner & Secretary ba khmih ia ka tnad IPR lyngba ka kyrwoh.
Ula pyntip ruh “La rai ha ka jinglang ba ia kum kine ki kabu bad ki International lane National Film festival ba hadien habud, kan sa don noh da ka Selection Committee ka ban khlieh da u Chief Secretary ka Sorkar Jylla, ka ban jied ia ki briew kiban leit iashimbynta hadien ka jingiasyllok bad baroh lai tylli ki Tnad kum ki dkhot ka Committee bad ruh da ka jingiamynjur bad iarai lang”.
Ka kyrwoh kala ong ruh ba la iai ban ba watla ki Tnad ka Sorkar Jylla kin phah iala ka jong ka jingtyrwa naka bynta ka jingjied ia ki nongshna phlim ka Jylla sha ki tamasa, hynrei ka jingjied hi ka shong ha ka Information and Broadcasting Ministry ka Sorkar India bad ka long laitluid ia ka ban leh ia kane kum ka Ministry.
“Hynrrei, ka Tnad IPR kala iakren ia kane ka kam ban bujli noh ia ki briew bad ka Information & Broadcasting Ministry, ka Sorkar India ka ban shong kat kum ki kyndon ban rukom treikam jong ka” ula bynrap.
