Shillong, Nailur 24: Ka Sorkar Jylla ka la rai ban thaw daka Committee ban peit bniah ia ki jingeh kiba iakynduh da ki Pharmacist ha ka jylla.
Haba kren sha ki lad pathai khubor hadien ba la iakynduh ia ka kynhun samla pule Pharmacist, ka Myntri ka tnat ka koit ka khiah Kong Ampareen Lyngdoh ka la ong, “Ki la wanrah ruh ha nga ia ka jingshisha ba ka Service Rules kam don. Kane ka dei ka mat kaba kongsan bha bad ka Sorkar ruh kan shimkhai halor kane”.
“Namar kata nga la rai ba ngin sa don ka jingïamir jingmut bad baroh ki samla pule Pharmacist kiba khlem pat ioh kam, kiba la pynsngew ba ka Sorkar ka donkam ban sngap ïa ki katto katne ki jingai jingmut. Kumta, ngin thaw daka Committee ban khlieh da u commissioner & secretary, ha kaba kane ka Committee kan peit ia kine ki jingeh baroh bad ban lap balei ba kane ka jingpynrung kam ia baroh kine ki briew kiba tbit kam long katkum ki kyndon ka IPH” ong ka kong Ampareen.
Ka Kong Ampareen ka la pynthikna ruh ban iakynduh biang ia kane ka kynhun ha ka 28 tarik mynta u bnai.
Ka la ong ba ka tnat ka dang peit ruh ia ki jingai jingmut ha kaba iadei bad ka jingdie dawai ha ki katto katne ki dukan dawai.
“Ngam shym la tip ba ka don ka jingai laisen ia ar jait ki dukan dawai bapher. Kum ka nuksa haka jingshisha ym dei ban suk ban ioh thyrnia katkum ka jingiathuh ka kynhun Pharmacist” kala ong.
“Kumta, kine baroh ki dei ki mat kiba kongsan bad nga la pynthikna ïa ki ba ngin ïashong lang bad hadien ka jingïashong jong ngi ha ka 28, ngan sa rah iaka jingiakren bad u Myntri Rangbah” kala bynrap.
Haba pyntip ba baroh ki district kim Drug Inspector, ka Kong Ampareen kala ong “Naduh u snem 1972 haduh kine ki sngi ngi la sakhi iaka jingkha ki District thymmai ka nuksa u ophisar ba la wan ban mihkhmat ia ka Sorkar, u la pyntip ba kim don Drug Inspector kiba biang kumta kane ka dei ka jingduna kaba khraw, mano ban leit jurip iaki dukan. Ngan wad bniah halor kane hashuwa ban shim ia kano kano ka rai”.
“Ngi dei ban khanglad ia kane, ngim lah ban ailad ia kane ban jia, ngi la iohi ba mynta ka pynmih shibun ki jingeh ha ka imlang sahlang, ngi hap ban long kiba pyrkhing bad ngi hap ban bud ia ki kyndon, ka jingpeit bniah ka hap ban dei ban pynlong man ka por bad ngi hap ban long kiba pyrkhing bha halor kane katkum ka ain,” ka la bynrap.
