Shillong, Naitung 09: Kum shi bynta ban kyntiew ia ka kam jngohkai ha ka jylla Meghalaya khamtam ban shna ia ki jingtei kiba remdor (Luxury) bad ki kam jngohkai kiba iadei bad ka mariang, ka sorkar jylla kala rai ban tei ia ka Five Star Luxury Resort ha East Khasi Hills bad West Garo Hills bad kala dep ban ithuh ia ka jaka ha Sohra bad Umiam.
Haba pynbna ia kane hynne ka sngi Balang, u Myntri ka tnad jngohkai Bah Paul Lyngdoh ula ong, ba ia katei ka rai la shim ha ka jingialang kaba la lum da u Myntri Rangbah u Conrad K Sangma hynnin ka sngi Ba-ar, kaba la iatai sani halor ki projek bapher bapher kynthup ia ka Five-Star Luxury Resort ha Sohra bad ka “Glamping Site” ha Sohra bad Umiam.
“Nga dap da ka jingkmen ban pyntip ba ngi lah shim ia ki sienjam kiba kongsan bad ngi lah jam sha ka PPP Mode ha ki katto katne ki sienjam. Kawei na ki sienjam kaba la sdang ban iaid shakhmat kadei ka jingtei ia ka Five Star Luxury Resort ha Sohra. Ngin pyndep ia ka Financial Bid ha ka 11 tarik u Naitung” ula ong.
U Myntri ula pyntip ba ka sorkar kan pyntrei ruh ia ka Integrated 5-Star Resort ha Umiam. Kane ka projek kan dei ha ka jaka ba heh 35 akar bad 36.78 akar ha ka dewlynnong bad la khmih lynti ba shen yn sa sdang noh ia ka jingkhot Tender.
“Ha Umiam, da ka jingaiti noh ka tnad Forest and Environment ia ka jaka kaba 300 akar, mynta ngin sa lah ban pyniar ia katei ka project na ka bynta ka Five Star Resort, kaban don ia kyrdan ha ka pyrthei bad ka jingsngewsarong ia ka kam jngohkai ka Meghalaya” ula ong haba bynrap “Ngin sa pyndonkam ruh ia ka jaka dewlynnong kaba 36.78 akar kaba dei shi bynta jong ka pung Umiam ia kaba mynshwa la pyndonkam da kawei ka kynhun shimet, mynta ia kane ruh lah dep ban iapynbeit. Mynta ngin don sa 35 akar ka jaka khyndew bad sa 36.78 akar ka dewlynnong kaban long shi bynta jong ka Five Star Resort.”
U Bah Paul ula ong ruh, ba ka Sorkar kala shim rai ban tei pynbha ia ka Polo Orchid Hotel ha Tura haba iathuh ba ia kane ka Hotel yn sa kyntiew kyrdan sha ka jingtei kaban don palat 100 tylli ki kamra bad la khmih lynti ba kan khring bha ia ki nongjngohkai sha kane ka thain.
Ula pyntip shuh shuh ba ka sorkar kala dep ban ithuh ia ki jaka ha Sohra bad Umiam na ka bynta ka ‘Glamping sites’, kaban long ka project ba kyrpang bad kaba thymmai hapoh Meghalaya.
“Ngin sa lah ban iohi ia kine ki ‘Glamping Site’ kiba lah ban sdang treikam ha kane ka mang tyngka jong une u snem hi” la ong u Myntri Sorkar.
Haba pynshai halor kane ka jingthmu jong ka sorkar, u Bah Paul Lyngdoh ula ong, “Kine ki sienjam kiba kyrshan da ki subsidy bad ki khajna ba ioh na ka MIIPP bad NE Industrial Policy kan iarap shibun ha kaban kynjoh sha ka thong ban long ka jaka jngohkai ba remdor bad ia ka Eco Tourism bad kadei ruh kaba iaid ryngkat ryngkat ia kaei kaba ngi ialeh ban kyntiew mynta”.
U Myntri Sorkar ula ong ruh, ba ki kam ban pyniar ia ka Shillong Airport kadei kaba la khmih lynti ban pyndep hashwa ban kut u snem 2026, ha kaba kin don man la ka sngi, ki liengsuin na Shillong sha Tura bad Guwahati.
Ha kaba iadei abd ka Shillong-Tura Helicopter Service, ula ong ba ia kane ka jingai jingshakri kadei kaba la khmih lynti ban pynsdang treikam biang man la ka sngi shisien ba la pyndep ia ka jingpyniar ia ka kad liengsuin.
 bad ki kam jngohkai kiba iadei bad ka mariang, ka sorkar jylla kala rai ban tei ia ka Five Star Luxury Resort ha East Khasi Hills bad West Garo Hills bad kala dep ban ithuh ia ka jaka ha Sohra bad Umiam.){kind=link}