Shillong, Lber 26 : U Myntri ka tnad Pule Puthi Bah Lahkmen Rymbui ula pynbna ia ka rai jong ka Sorkar ban tei ia kumba 680 tylli ki iingskul thymmai ha kylleng ka Jylla hapoh ka Phase-IV jong ka Mission Education.
“…kawei pa kawei ka skul la khmih lynti ba kin ioh kumba T.70 lak”ong u Bah Rymbui haba plie ia ka Iingskul ba thymmai jong ka Darang LP School ha ka sngi Palei.
Haba phaikhmat sha ka jingpynroi ia ki jingtei, u Myntri ula pynpaw ba bun ki prokram lah pyntreikam hapoh ka Mission Education bad pyntip ba ka Iingskul ba dang shu plie ka dei shibynta jong ka Mission Education Phase-III.
U Bah Rymbui ula kren ruh halor ki kam bala pyntrei da ka Sorkar Jylla naduh u snem 2018 ban pynbha bad kyntiew ia ka kam pule puthi.
U iathuh ba ha ka jingiakren bad u Myntri Rangbah Conrad K Sangma, ka Sorkar kala ithuh ia saw tylli ki paia ban tei pat ia ka pule puthi-ki jingtei, ki nonghikai, ka policy, bad ki khynnah skul, kiba iai bteng ban btin lynti ha ka jingpynkylla ia ka rukom treikam.
Ula pynbna ba ka Amlarem Constituency ka lah ban ioh jingmyntoi hapdeng ka 8 haduh 11 tylli ki IIngskul hapoh ki Phase ban wan jong ka Mission, kaba la khmih lynti ba kan kyntiew bha ia ka jingdon ki jaka pule ba paka ha ka thain.
Ha kane ka sngi, u Myntri ula aiti ruh ia ka kamra computer ha ryngkat ki tiar ki tar, bala bei tyngka na ka SRWP 2025-26, kaba thmu ban kyntiew ia ka jingpule lyngba ki kor digital hapdeng ki khynnah skul.
