Shillong, Risaw 25 : Ka Sorkar Jylla kala rai ban phah siang rong thymmai ia baroh ki surok kiba kongsan, kiba don ha kylleng ki jaka ka sor Shillong.
Haba pyntip ia kane hynne ka sngi Thohdieng, u Symbud Myntri Rangbah ba khmih ia ka kam pynroi sor Bah Sniawbhalang Dhar ula ong “Ka Tnad PWD kala pynkhreh ia ka mang pisa ban siang rong thymmai ia baroh ki surok ba kongsan ha sor khnang ba ngin ioh ia ki surok kiba bha”.
Kane ka rai ka dei kaba la shim hadien ba kala Sorkar kala rai ban ym pyntreikam shuh ia ka smart road jong ka Smart City project, hadien ka jingshem ba ka project kam iahap satia.
“Kane ka dei ka Smart City phase-II. Balei ngi pynsangeh noh namar ki don katto katne ki jingeh, ka project kam lah ban iaid shakhmat. Ha ka jaka jong ka, ngi la pyrshang ban bujli na ka Sorkar Jylla da kaba siang rong thymmai ia ka surok ba kot kumba 40-50 km hapoh ka sor” ula ong.
Haba kylli, u Bah Sniawbha ula pyntip ba un sa pan ia ki jingtip na ki Ophisar halor ka jinglong jingman jong ka smart road ba pulom ha Lachumiere bad lano ba yn sap lie noh ia ki paidbah ba kin pyndonkam.
