Shillong, K’lyngkot 16 : Ka Sorkar Jylla kala rai ban pynsangeh shuwa ia ka jingtyrwa ban shna ia ka project “Skywalk” na Barik Point, Shillong hadien ba ioh pdiang ia ka assessment report, kaba pyni ba ka jingpyntrei ia kane ka project kan lam sha ka jingdheng kali kaba shyrkhei bha.
Haba pyntip ia kane, u Myntri Rangbah Conrad K Sangma ula ong “Ngi la pynsangeh shuwa ia ka project Skywalk. Ka daw ka long namar ngi la ioh ia ka kaiphod ba bishar ia kane ka kam kaba pyni ba shisien ba ngi sdang pyntrei hangne, kan sa mih ka jingdheng kali kaba shyrkhei ha kane ka surok”.
“Watla ngi la don ia ka plan, ka rai ka long ba la ngin sdang ia ka kam bad mad ia ka jingdheng kali ha kane ka shisnem ban wan lane shisnem shiteng lane ngin ia ap shuwa tad haduh ba ngin da ioh ia kawei pat ka lynti ba ngin jam shakhmat. Kumta, ngi la rai ba na ka bynta ka bha ka miat u paidbah, watla kane ka project ka dei kaba paka palat, ban sdang pat ia ka kan lam sha ka jingdheng kali, kumta ngi la pynsangeh shuwa shipor” ula bynrap.
Halor ka project ban pynitynnad ia ka Wahumkhrah, u Myntri Rangbah ula pyntip ba ka Sorkar kala dep ban aiti ban pyntrei noh ia ka kam jong kane ka project kaba kot palat T.30-40 klur.
