Shillong, Naiwieng 26 : Ka Sorkar Jylla kala rai ban pynkynriah ia ki dukan madan sha ki jaka shong dukan madan bala ithuh kyrpang ha ka thain Khyndailad bad Civil Hospital, ha ka wat kaba nyngkong.
Kane ka dei ka rai kaba la iashim lang ha ka jingialang bala pyniaid da u Symbud Myntri Rangbah ba khmih ia ka Tnad Urban Affairs bad u Myntri ka Tnad Jngohkai, Myntri kam rep, Myntri kam ri jingri bad ki nongmih khmat na ka Tnad ka Koit ka Khiah, ka tnad Urban, PWD bad kiwei kiwei ki Tnad bad ki kynhun ba don bynta.
Ia kane ka rai la shim haba pyntreikam ia ka jingbthah jong ka Iingkashari Meghalaya High Court, kaba bthah ia ka Tnad Urban Affairs ban thung ia ka Committee kaba kynthup ia ki bor Sorkar ban ithuh ia ki jaka shong dukan madan ba kyrpang na ka bynta ki nongshong dukan madan.
Ha ka kyrwoh bala pynmih da u Additional Secretary ka Tnad Urban Affairs hynne ka sngi Ba-ar, la ong “La rai ba ha ka wat ba nyngkong, yn pynkynriah ia ki nongshong dukan madan sha ki jaka bala dep ithuh ha ka thain Khyndailad bad Civil Hospital”.
“Ka Tnad ka khmih lynti ban pynbna ia kine ki jaka shong dukan madan ban pyntip ia kane ka jingtip sha ki nongshong dukan madan ba dei hok ban ioh jaka, kham kloi kat kaba lah. Hadien kane, yn ai por 30 sngi ia ki nongshong dukan madan ba kin pynkynriah ia ki tum ki tam hadien bala dep ai ia ki syrnot, kat kum ka skhim” kala ong.
“Ka Town Vending Committee (TVC) kala iakren man ka por bad ki seng ki nongshong dukan madan bad kala shim ruh ia baroh ki sienjam ban pynthikna ba kane ka jingpynkynriah kan dei kaba iaid da ka pali. Ia ka Street Vending Plan bala dep mynjur, yn sa buh noh shen ha ka rynsan paidbah” kala bynrap.
Ban iada ia ka hok jong ki nongshong dukan madan bad ban teh kyndon ia ki kam shong dukan madan, ka Sorkar India kala pyntreikam ia ka Street Vendors (Protection of Livelihood and Regulation of Street Vending) Act, 2014. Kane ka Act ka bthah ia baroh ki Jylla ban thaw ia ka Town Vending Committee, ban ithuh bad register ia ki nongshong dukan madan bad ban phiah ia ki jaka ba dei shong dukan madan bad ki bym dei.
Ban pynbeit ryntih ia ka jingleh survey bad ban ithuh ia ki nongshong dukan madan kiba dei hok, ka Jylla kala thaw ia ka Meghalaya Street Vendors (Protection of Livelihood and Regulation of Street Vending) Scheme in 2023.
Kane ka skhim ka kren ia ki nongrum halor ka jingpynithuh ia ki jaka shong dukan madan bad ka rukom iaid ha ka jingpynbna ia ki. Kala kren ruh halor ka jingai ia ki Certificate of Vending (CoV) sha ki nongshong dukan madan kiba dei hok.
Ka Tnad kala pynlong ia ka survey ha ki 22 tyli ki jaka hapdeng u Nohprah 2022 bad Kyllalyngkot 2024 kat kum ka kyndon jong ka skhim bad kine ki jaka ki kynthup ha ka thain Khyndai Lad, Assembly, Barik, Dhankheti, Firebridge, GS Road, Governor, IewMawlong, Laban, Jail Road, Lachumiere, Laitumkhrah Firebrigade, Lumshatsngi, Malki, Motphran, Polo, Qualapatty, Quintton Road, Red Cross, Umsohsun, Wahthapbru, bad Wards Lake.
