Shillong, Naitung 20 : Ka Sorkar Jylla kala rai ban pynkiew noh ia ka dor jong ka diesel bad petrol da 50 naia.
Haba pyntip ia kane hadien ka jingialang jong ka Kynhun Myntri, u Myntri Rangbah Conrad K Sangma ula ong ba ka dor jong ka diesel hapdeng ka Meghalaya bad ka Assam ka heh bha ia mynta.
Ula pyntip ba ha Guwahati, ka dor ka long T. 90.33 katba ha Khanapara, Ri-Bhoi District ka long T. 84.10. Kane ka mut ba ka jingiapher ka long haduh T. 6.23 naia ha ka diesel.
“Kumta haba khmih ia ka jingioh lum khajna na ka bynta ka Jylla, ngi la rai ban pynkiew noh ha ka wat ba nyngkong da 50 naia” ong u Conrad haba iakren bad ki nongthoh khubor.
Ula nang bynrap “Ngin buh ia artylli kiei kiei ha ka jingmut jingpyrkhat jong ngi. Kawei ka long ba ka dei ban don ka jingiapher ha ka dor khnang ba ngin kham pynmyntoi hapdeng ka iew Guwahati bad iew Khanapara, Ri-Bhoi. Kaba ar, ngin buh ha ka jingmut jingpyrkhat ia ka national average khnang ba ki dor baroh kin nym tam ia ka national average”.
Kat kum ka jingong jong u, ka Jylla Meghalaya ka dei kaba la lah ban pynneh ia ka dor ba rit tam haba phai sha ka diesel bad petrol hapoh ka Ri kumba ka long mynta.
Pule ruh: Rai ka Sorkar ban thied jaka ha pung Nongmahir ban kyntiew kam jngohkai
