Shillong, Nailar 04 : Ka Sorkar Jylla kala rai ban khot iakren biang ia ki Nongtrei SSA halor ka jingdawa ban pynkiew ia ka tulop.
Haba pyntip ia kane hynne ka sngi U Blei, u Commissioner & Secretary ka Tnad Pule Puthi Vijay Kumar Mantri, ula ong ba ka jingialang ba-ar jong ka Rationalisation Committee bala thaw da ka Sorkar ban shong bishar ia ka jingtyrwa pynkiew tulop ia ki nongtrei SSA, kan long ha ka 8 tarik Nailar.
“Baroh ki dkhot kila mynjur ia ka jingai jingmut jong ka bynta ba nyngkong. Hynrei hadien kila pynpaw ia ka jingbym hun bad ki kwah ban don ka jingpynkiew tulop ba long mat katjuh ia baroh ki kyrdan” ula ong.
Haba kylli, u Mantri ula ong “Hooid, ka jingdawa jong ki ka long 80% ia baroh. Kito kiba dang shu rung kam dang shen bad kitp kiba la rungkam 20 snem mynshuwa kin ioh ia kajuh ka tulop kaba mut ba kam don satia ka jingpynshong nongrim, kam don jingkhein ia kiba la trei slem”.
“Ia mynta, ki DEO ki ioh T.8000 bad ki Coordinator ki ioh T.35000 bad lada ngi pyntreikam ia ki jingdawa jong ki, ki DEO kin ioh T.14400 bad ki Coordinator kin ioh T.63,000, kane ka dei ka jingleh bym hok ia ki DEO. Ka jingiapher hapdeng jong ki kala long palat” ula bynrap.
Ka jingialang ba nyngkong jong ka Rationalisation Committee ki 20 ngut ki dkhot bala khlieh da u Commissioner & Secretary ka Tnad Pule Puthi, kaba long ha ka 2 tarik Nailar, kala iakren ia bun ki mat bad ki kyndon bala buh bad kala shim ia 5 tylli ki mat ai jingmut.
Kum shibynta jong ki jingai jingmut ba nyngkong, ka tulop jong ki Nongtrei ha Block bad Grade-IV (Chawkidar, Cleaner, Peon) ha District bad Block la ai jingmut kumne : T.14000 la ai jingmut ban ai sha ki Block DEO kiba la shakri hapoh ka 5 snem, T.15000 ia kiba la shakri 5 snem bad T.16000 ia kiba la trei duna eh ia ka 10 snem. Ia mynta, ki Block DEO ki ioh tulop ba T.8000 manla u bnai.
La ai jingmut ruh ba ka tulop jong ki Block MIS Coordinator kan kiew na ka T.10000 sha ka T.15000 ia kito kiba la shakri hapoh ka 5 snem, T.16500 ia kiba la shakri ia ka 5 snem bad T.18500 ia kito kiba la shakri duna eh ia ka 10 snem.
Kumjuh ruh, ka Committee kala ai jingmut ba ka tulop jong ki Block ACSS la pynkiew na ka T.12000 sha ka T.16000 ia kito kiba shakri hapoh ka 5 snem, T.17500 ia kito kiba shakri 5 snem shaneng bad T. 19000 ia kiba la shakri 10 snem shaneng.
Nalor kane, ka Committee kala ai jingmut ruh ba ka tulop jong ki Chowkidar, Cleaner, Peon ha ki District bad Block kan kiew sha ka T.14000.
Ka jingiashong kyllain mungor jong ki nongtrei SSA kiba don hapoh ka lama All Meghalaya SSA Non Teaching Staffs Association (AMSSANTSA) kala poi sha ka sngi kaba san hynne ka sngi U Blei.
Kine ki Nongtrei kila pynlong ia ka jingiaseng bad iarwai ia ki jingrwai gospel ha kane ka jaka ba iashong kyllain mungor.
