Shillong, Nohprah 07: Ka Sur Ka Bri u Hynniewtrep (SKBUH) hynne ka sngi kala pynbna ban pynlong ia ki Pocket Meeting ne jingialang ha ki Shnong ki Thaw, haka 8 tarik u Nohprah 2022 halor ka jingslem ban pynmih iaka kaiphod shah siat iap u nongialam barim ka sengkieng atiar HNLC u bah Cheristerfield Thangkhiew (Bam Kwai Dwar U Blei).
La iathuh ba kine ki jingialang kin sdang na Mawlai Kynton Masar naduh ka por 6 baje janmiet bad yn sa pynlong sha kiwei kiwei ki jaka ka thain Mawlai bad kiwei ki shnong hapoh ka nongbah Shillong.
Ha kane ka jingialang yn ia shim bynta lang haduh 14 tylli ki seng bapher bapher hapoh ka jylla ba kynthup iaka HYC, HANM, UHM, MYF, MPSO, RBYO, STIEH, AIM, HUAM, WKSU, EJNC, JSM, JYF, HWWDO.
Naka liang u Chairman ka SKBUH bah Donbok Kharlyngdoh u la ong ba kane ka jingthmu ban pynlong ia ki jingialang ka dei kum shi bynta ban khot ban wer iaki longkmie ki longkpa bad ki khun samla ka jylla ba kin wan ban snoh kti lang bad Ka Sur ka Bri u Hynniewtrep ban pynkhlaiñ shuh shuh ia ka jingdawa ban bishar hok haba iadei bad ka jingshah siat iap u bah Che.
U bah Donbok u la ong ba Ka Sur ka Bri u Hynniewtrep ka kwah ba ka sorkar jylla kadei ban bishar hok haba iadei bad ka jingshah siat ia bah Che namar ki paidbah kim kwah shuh ba kum kane ka jingjia kan dang jia ha ka bri u hynniewtrep khamtam ha ki pateng kiban dangwan.
“Ka Sur Ka Bri u Hynniewtrep ka dawa ruh ba ki to kiba donkti ban shim jubor da ka ba siat iap ia u bah Che ki dei ban ngat haka jingpynshitom kat kum ki kyndon aiñ” la ong u bah Donbok.
