Shillong, Jymmang 03 : Ka People Democratic Front (PDF) kala shim ia ka rai ban leit bynrap lang noh (merge) sha ka National People’s Party (NPP) kaba ialam ia ka Sorkar Meghalaya Democratic Alliance (MDA)-2.
Ia kane la pynbna hynnin ka miet da u Myntri Rangbah ka Jylla Conrad K Sangma, na ka rynsan ialap elekshon ia u kyrtong ka NPP Bah Samlin Malngiang, u ban iakhun ia ka elekshon MLA ha Sohiong ka ban long la 10 tarik Jymmang.
U Conrad ula pyntip ba ka PDF kala shim ia kane ka rai ha ka jingialang jong ka Central Executive Committee (CEC) ba long hynnin ka sngi. Ula pyntip ba kane ka jingwan bynrap jong ka PDF sha ka NPP kan long ha ka 6 tarik Jymmang.
“Ka jingialang jong ka CEC ka PDF da kawei ka jingmut kala rai ban bynrap lang noh sha ka NPP bad baroh ki Nongialam ba hakhmat ka PDF bad ki arngut ki MLA jong ka, kin sa wan noh sha ka NPP” ula ong.
Ka PDF ka don ia arngut ki MLA hapoh ka Iingdorbar Thaw Ain ka Jylla bad kine ki dei u President ka Party Bah Gavin M Mylliem uba mihkhmat ia ka Sohra constituency bad u Working President Bah Banteidor Lyngdoh uba mihkhmat ia ka Mawkynrew constituency.
Ka NPP kaba don 26 ngut ki MLA ha ka Iingdorbar Thaw Ain, kan sa nang kiew ha ka jingdon ki MLA sha ka 28 ngut da ka jingwan iasoh sa ki MLA ka PDF.
Ka NPP ka duna mynta satang 3 ngut ki MLA ban ioh ia ka absolute majority (31) ha ka Iingdorbar ba 60 ngut ki MLA.
Ka jingwan bynrap lang jong ka PDF kan dei ka jingai mynsiem ia ka NPP ha ka elekshon MLA ha Sohiong, kaba la pynkynriah na ka 27 tarik Rymphang namar ka jingkhlad noh u kyrtong ka UDP Bah HDR Lyngdoh uba dei u Myntri kam pohiing barim ka Jylla.
U Conrad ula pynbna ia kane ka jingwan bynrap lang ka PDF ha ki rynsan ialap elekshon baroh shimiet ha kylleng ki shnong ka Sohiong constituency. U Conrad ula iakynduh ia ki paidbah, iakren bad ki bad iashad ruh bad ki ha ka shnong Lawmei, Nongpathar bad ha Kreit.
Haba kren ha ki jingialang, ula ong “….bun ngut ki nongialam mynta kila wan pyniasoh sha ka NPP. Mynta ka sngi ruh, ki nongialam na ka UDP bad kiwei ki party kila wan iasoh sha ka NPP…Mynta ka sngi (sngi ba-ar) ka PDF party ha ka jingialang jong ka Central Executive Committee, kala rai ba baroh ki MLA bad ki Nongialam kin sa wan bynraplang noh sha ka NPP”.
“Kin sa wan bynraplang bad iasoh bad ka NPP ha ka 6 tarik mynta u bnai ha Shillong” ula bynrap.
Haba kyntu ia ki paidbah ban vote ia ka NPP, ula ong, ki paidbah shuwa ka elekshon kim ju tip mano ban long u Myntri Rangbah lane kano ka party ka ban wan ha ka bor hynrei ha kane ka eleshon ha Sohiong, ki paidbah kila tip lypa ia u Myntri Rangbah bad ka Party kaba don ha ka bor, kata ka NPP..namar kata, ka jingai vote ia ka NPP kan dei kaba don jingmut.
“(Ha ki elekshon bala dep) ngim tip iano ban vote, hynrei ha kane ka elekshon phi la tip lypa mano ba dei u Myntri Rangbah jong phi, ula ieng hakhmat jong phi. Phi la tip lypa ba ka sorkar ka dei ka sorkar ba ialam da ka NPP bad phi top ba kane ka dei ka Sorkar kaba lah ban wanrah ia ka roi ka par ha ka constituency bad ka thain” ula ong.
Ula ong ruh ba ki MLA jong kiwei ki party kum ka Congress lane ka UDP ki lah ban ioh ia ka MLA skhim ba T. 2 klur manla u snem hynrei u Myntri Rangbah u don T. 17000 klur ka skhim ia ki paidbah. Namar kata, lada ki paidbah ki vote ia u kyrtong u Myntri Rangbah, phi lah ban pyrkhat katno phin ioh ia ki kam pynroi bad ki skhim.
Pule lang ia kane: Kyrshan borbah ka NeIPS ïa ki briew ba khlem kam khlem jam ha Nongstoiñ
