Shillong, Risaw 07: Ka Meghalaya Sarva Shiksha Abhiyan Schools Association (MSSASA) shen kan leit ban mudui sha ka iingbishar Supreme Court pyrshah ia ka hukum jong kane ka kashari kaba la pynmih ha ka 1 tarik u Nailur, ba bthah ba dei ban pynlong kongsan ia baroh ki nonghikai ba ki dei ban pyndep ia ka Teacher Eligibility Test (TET) khnang ba kin lah ban bteng ia ka jingshakri ka jongki.
Ia kane ka rai la shim ha ka jingialang jong ka General Body ka Association kaba long ha Madan Malki ha ka sngi Nyngkong.
Haba iakren bad ki nongpathai khubor, u President ka MSSASA Bah Aristotle Rymbai ula ong, ba katkum ka jingioh ia ki jingai jingmut na ki riewstad ain, ka Association kan iakhun pyrshah ia katei ka hukum ba la pynmih, kaban ktah ia ki nonghikai kiba la shakri la slem bha bad kiba lah jan shongthait noh na ka kam.
U Bah Rymbai ula batai ba ka rai jong ka Supreme Court kadei kaba la pynshong nongrim na ka Notification jong ka National Council for Teacher Education (NCTE) ha u snem 2010 bad ka jingpynkylla ia ki kyndon ne Amendment ha u snem 2017 ia ka Right to Education (RTE) Act.
Hynrei, ka Tnad Pule Puthi kham mynshwa, kala dep ban pyllait noh ia ki nonghikai kiba la shah thungkam hashwa jong ka 23 tarik u Nailar 2010 na ka TET, ha ka jylla (MTET), ha kaba katei ka hukum kaba la pynmih dang shen kala iaid noh halor jongka.
Katei ka jingpynmih hukum kan ktah kumba 10,000 haduh 15,000 ngut ki nonghikai ha ka jylla Meghalaya, na kumba 43,102 ngut ki nonghikai kiba don ha ka jylla.
Katkum ka jingong ka MSSASA, ka Central TET (CTET) bad ka Meghalaya TET (MTET) ki long kumjuh bad ki nonghikai kiba la pyndep ia ka CTET kim donkam shuh ban ialeh biang ia ka Test kaba la pynlong da ka jylla.
 shen kan leit ban mudui sha ka iingbishar Supreme Court pyrshah ia ka hukum jong kane ka kashari kaba la pynmih ha ka 1 tarik u Nailur, ba bthah ba dei ban pynlong kongsan ia baroh ki nonghikai ba ki dei ban pyndep ia ka Teacher Eligibility Test (TET) khnang ba kin lah ban bteng ia ka jingshakri ka jongki.){kind=link}