Shillong, Nailur 30 : Ka Sorkar Meghalaya bad Assam, kila rai ban aiti noh sha ka Central Bureau of Investigation (CBI) ba kan tohkit ia ka jingshah siat iap ki 5 ngut ki riew paidbah ha Mukroh, kaba jia ha ka 22 tarik Nawieng 2022.
Ia kane la pyntip da ki arngut ki Myntri Rangbah ka Assam Himanta Biswa Sarma bad Meghalaya Conrad K Sangma, haba iakren bad ki lad pathai khubor hadien ka jingialang iakren pynbeit khappud ba long hynne ka sngi Saitjain ha Guwahati.
U Himanta Biswa ula pyntip ba ki ar Sorkar kila rai ruh ban pynduh noh ia ki Judicial Inquiry Commission ba kila thung namar ka jingshem ba kim poi shano shano ruh.
Halor ka jingtohkit CBI, u pyntip ba ki ar Sorkar kin sa kyrpad ia kane ka kynhun tohkit ba kan ym register ia ka case la ka dei ha Nongbah Shillong ne ha Guwahati hynrei ban register sha kiwei pat ki jaka kibym don jingiashah liang.
U Himanta ula ong ba ka Judicial Inquiry bala thung da ka Assam ne Meghalaya kam poi shaei shaei ruh namar ha ka jingtohkit ka Commission na Assam, la shem ba ki sakhi na Meghalaya kim wan satia shakhmat bad kumjuh ruh ka long ia ka Commission na Meghalaya ha kaba ki sakhi na Assam kim leit mih satia.
Kumban shu pynkynmaw, ha ka 22 tarik Naiwieng 2022, 6 ngut ki briew kila iap ba kynthup ia uwei u Pulit Forest Guard ka Assam bad 5 ngut ki nong Mukroh ha ka jingther kuli ki Pulit Assam ha Mukroh.
