Rai ka KHADC ban pyntreikam pura noh ia ka Market Act ban myntoi ki paid Nongrep

Shillong, Nailar 17: Ka Executive Member ka Khasi Hills Autonomous District Council (KHADC) kaba khmih iaki Iew ki hat Kong Grace Mary Kharpuri, hynne ka sngi Palei, kala ong ba ka District Council kan pyntreikam pura noh iaka Khasi Hills Autonomous District (Establishment, Management and Control of Markets) (Second Amendment) Regulation, Act 2021, na ka bynta ban iada bad ai jingmyntoi ia ki paid nongrep.

“Kadei ka kamram ka jong ngi ban pynmih iaka jingpynbna paidbah bad ban pyntreikam noh mardor ia katei ka aiñ bad kane ka aiñ kan treikam ha baroh u pud u sam jong ka District Council” ong ka Kong Grace Kharpuri haba iakren bad ki nongthoh khubor.

Kala ong ba katei ka aiñ ka long ka jingkyrkhu kaba khraw ia ki nongrep ha kaba yn shimkhia ia kiba bun ki jingeh kiba mad da ki nongrep kynthup halor kaj ingshah ot kilo ki marrep bad kan shimkhia ruh ha kaba iadei bad ka bha kamiat jong ka jingdie iaki jingri.

Ka Kong Grace kala pyntip ba ka Executive Committee kan sa buh ruh ia ka dor jong ki marrep ne ka Minimum Support Price kaban long ka jingiarap na ka bynta ki nongrep.

Ia katei ka ain kaba la mynjur da ka KHADC 2 tarik u Lber 2021 kala ioh iaka jingmynjur na u Lat ka jylla ha ka 26 tarik u Naitung mynta u snem.

Ka jingthmu jong katei ka aiñ ka long ban kyntiew bad ban plie lad ban pyniaid iew ia ki marrep bad iaki jingri bad ban don ruh ka jingkhuid jingsuba ha ka jingpyntreikam ia katei ka kyndon aiñ.

Yn sa thaw iaka Agriculture Produce and Livestock Marketing Facilitation Sub-Committee (APLMFSC) ban pynthikna ba baroh ki lad jingiada katkum ki aiñ ki kanun bad ban burom ia ki hok jong ki nongrep ha kaba iadei bad ka jingdie ia ki marrep bad ia ki jingri ha ki iew ki hat.

Ka sub-committee kan sa thew sa who ha kaba iadei bad ka jingthied jingdie ia ki marrep kaban long katkum ka Minimum Support Price kaba la buh da ka District Council, na ka por sha ka por.

Nalor kane kan kyrshan bad plie lad ruh ban pyniaid iew ia ki marrep bad ia ki jingri bapher.

Pule lang ia kane:  Kular u CM ban shimkhia ka Sorkar ia ki jingeh ki nongtrei muster roll bad mid-day meal

Peit lang ia kane

Ka rynsan khubor digital ba pura ka Meghalaya da ka ktien Khasi.

Balei ban ap ia ka lashai, haba ki khubor ki mih mar syn jia!

Bud ia ka Ki Khubor na ka Shlem ban ioh ia ki khubor ba dang shu jia bad ba thymmai!