Shillong Nohprah 10: Ka Khasi Hills Autonomous District Council (KHADC) kala pynbna ba kan pynmih noh shen iaka Notification ne Jingpynbna Paidbah ban ym shah shuh ia ki briew ki bym dei ki paid Khasi, Jaintia bad Garo ba kin nang thied jaka ha Raid Them Marwet nalor ban buh noh da u pud (Ceiling) ia ka jingthied jaka ban pyndonkam ha ki kam bapher bapher.
Ia kane ka rai la shim da ka jingialang jong ka Executive Committee (EC) ba ialam da ka NPP, kaba long hynne ka sngi Balang.
Haba iakren bad ki lad pathai khubor, u Chief Executive Member (CEM) Bah Pyniaid Sing Syiem ula pyntip ba kane ka jingbuh pud kan treikam ia baroh ki briew kiba don jaka ha Raid Marwet kynthup ki Khasi, ka ban batai ba haduh katno ki lah ban pyndonkam ia ki jaka jong ki haba pyntrei ia kano kano ka kam la ka dei ha ka rep ka riang, ka shna skul, college, skulbah, buh karkhana ne ki homestay.
Kat kum ka jingong jong u, ka jingbud pud ka long ym palat ia ka 2 akar ia kiba buh Homestar, 4 akar ia ki karkhana, 4 akar ia kiba buh Resort ne Hotel, 10 akar ia kiba rep jhur ne soh, 8 akar ia kiba tei skul, 10 akar ia kiba tei college, 15 akar ia kiba shna skulbah bad 5 akar ia kiba buh ia ki Vocational Institute.
U CEM ula pyntip ruh ba ia kito kiba kwah ri dohkha kam dei ban palat ia ka 3 akar, ri sniang, syiar bad kiwei kiwei kam dei ban palat ia ka 3 akar bad ka jingrep ia ki jingthung kiba hap hapoh ka cash crop kam dei ban palat ia ka 12 akar.
Ula pyntip ruh ba la buh ruh da u pud b aka jaka na ka bynta ka jingseng Hospital, Nursing Home ne Wellness Centre kam dei ban palat ia ka 5 akar, ki Sports Academy, Stadium bad Sports Complex kam dei ban tam ia ka 5 akar, ki jaka pule niam kim dei ban palat ia ka 5 akar, ki jingtei ha ka kam khaii pateng kim dei ban palat ia ka 5 akar.
Ha kajuh ka por, u CEM ula pyntip ba ka EC kala rai ban pynbna paidbah ba yn ym shah shuh iano iano ruh ki bym dei ki trai riewlum ka Jylla (Khasi, Jaintia bad Garo) ba kin ioh thied jaka ha Raid Them Marwet.
U pyntip ba ka KHADC kala thaw ia ka Committee ban sor jamin ia kawei pa kawei ka jaka ha Raid Them Marwet ban wad bniah ia ka jinglongtrai jong ki briew ia ki jaka puta ha katei ka thain.
