Shillong, Jylliew 28 : Ka Khasi Hills Autonomous District Council (KHADC) kala rai ban shong bishar thymmai biang ia ka jingtyrwa ban pynduh noh ia ka KHAD (Members Pension) Act.
“Ka EC barim kala wanrah ia ka Bill ban pynduhnoh ia ka Act. Hynrei, kane ka EC thymmai ha ka jingialang ba nyngkong kala rai ban shong bishar biang ia ka jingtyrwa” ong u CEM Bah Pyniaid Sing Syiem haba jubab ia ka jingiatai halor ka mang tyngka hynne ka sngi kut jong ka Dorbar Lyiur.
Ula iathuh ba phra ngut na ki MDC barim kila ioh pdiang ia ki bai bam tynmen katba palat 20 ngut kin dang ban ioh.
“Phi lah ban kylli ba kumno ngin siew bai bam sha ki MDC barim khlem da kynthup lang ha ka mang tyngka. Hynrei, ngi lah beit ban wanrah ia ki supplementary demand ban kynthup ia ka baibam tynmen sha ki MDC barim” ong u Bah Pyniaid.
Shuwa kane, haba iashimbynta ha ka jingiatai ia ka mang tyngka, u Nongialam ka Liang Pyrshah Bah Titosstarwell Chyne ula kyrpad ia ka EC ba kan mynjur ha kaban pynduh noh ia Ain haba buh hakhmat ia ka jinglong jingman ka pla tyngka jong ka Council.
Ki MDC barim ki ioh ia ka bai bam tynmen ba T. 5000 shibnai.
U iathuh ba ha ka por jong u kum u CEM ka Council, ki phra ngut ki MDC barim kila leit ban kyrpad ia ka Iingkashari, kaba la pynmih ia ka hukum ba bthah ia ka Council ban siew ia ka baibam tynmen jong ki. Kala don ka jingujor contempt of court ne ka jingpynkhein hukum pyrshah ia ka Council halor ka jingbym pyntreikam ia ka hukum bad khadduh %0% jong ka baibam la siew sha ki MDC barim.
“Mynta, sa 24 ngut ki MDC barim kila leit tied ia ka jingkhang ka Iingkashari ban ioh bai bam” ong u bah Titos haba bynrap b aka Council kan donkam ia ka song pisa ba T. 50-60 lak shisnem ban siew ia ka bai bam ki MDC barim bad kane kan long ka jingkit ba khia ia ka Council, kaba la mad lypa ia ka jingkyrduh pisa.
“Namar kata, nga kyrpad ia ka EC ba kan shong bishar bian gia kane ka kam ban pynthikna ba kum kine ki jingeh kin nym mih shuh lashai lashisngi” ula ong.
Ula kdew ruh “Lada u Secretary barim ka Council u sei ia ka bai bam tynmen ba T. 50,000, kin sa sdang ban buh jingkylli ba kumno ki MDC ki ioh tang T. 5000. Lada ki sdang ban dawa halor kane ka nongrim, ha kano ka rukom ba ka Council kan lah ban siew da ki klur tyngka sha ki MDC barim”.
