Shillong, Jymmang 11: U Excutive Members (EM) ka tnad Trade ka Khasi Hills Autonomous District Council (KHADC) bah Rangkynsai Kharbuki ula iathuh baka district council kan sa phah daka Show Cause Notice sha u Paul Leong u ba dei u trai jong kawei ka dukan ka ba don ha Iewduh.
Kane kala wan hadien ba u bah Paul Leong dang shen ula pyneh bad pynibor iaki Pulit ka KHADC haka por ba ki mut ban leit kynra iaki dukan ba don hapoh ka Building jong u ha Iewduh.
Haba kren shaki lad pathai khubor u bah Rangkynsai ula ong ba dang shen u bah Paul Leong ula dep ban aiti iaka hukum jong ka iingkashari halor ka jingioh bor jong u ban pyniaid iaki dukan ha kane ka Building ba udei trai.
Ula ong ba katkum ka hukum ka iingkashari, la ai bor ia u bah Paul ban ai wai dukan ha kane ka Building hynrei la bthah pat ba ka jingaiwai iaki dukan, kan dei ban iaid beit katkum ki kyndon treikam jong ka KHADC.
“U bah Paul Leong udei u trai jong ka dukan (Building) bad u don bor ban ai wai ia ka dukan jong u, hynrei ka dei ban long kat kum ki ain ki kyndon jong ka District Council, khamtam lada kiba shong dukan kidei ki bar jylla bad kidei ruh ban don iaki Trading License bad kiwei ki kot ba donkam” la ong u bah Kharbuki.
