Shillong, Naitung 17: Ka Hynñiewtrep Youth Council (HYC) mynta ka sngi ka pynbna ba kan iai pynbor ïa ka Sorkar Jylla ba kan bud dien bad ka Sorkar Pdeng ha kaban pyntreikam noh ïa ka Inner Line Permit (ILP) bad ka Meghalaya Residents Safety and Security Act (MRSSA) ha ka jylla.
Ïa kane la pynbna da u President ka HYC u Roykupar Synrem ha ka jingrakhe dap 10 snem ka HYC , kaba la long ha LARITI Shillong.
Haba ai jingkren ha kane ka prokram, u bah Roykupar u la ong ba naduh ba la seng iaka HYC ha u snem 2014, ka HYC ryngkat kiwei pat ki sengbhalang ha kane ka jylla Meghalaya ki la dawa ban pyntreikam noh ia ka ILP khnang ban iada ia ki trai ri trai muluk jong ka jylla.
“Lait na ka ILP, ka HYC ka la dawa na ka Sorkar Jylla ban pyntreikam noh ia ka MRSSA ban pyrkhing iaka jingwan kyrthep ki bar Jylla hynrei haduh kine sngi, ka Sorkar kam pat lah ban pyntreikam bad kane kala wanrah ia ka jingsngewsih iaki paidbah ka jylla Meghalaya khamtam ia ki samla” ong u bah Synrem .
U president ka HYC u kynnoh ba ka jingbym don ki lad ki lynti ban ïakhun pyrshah ïa ka jingwan buhai shnong ki bar Jylla ka la khanglad ïa ki trai ri trai muluk jong ka jylla ban ïoh ïa ka jingkhraw ha ka khaii pateng, ka rep ka riang bad kiwei kiwei.
“Ngi kwah eh ban iohi ia ka lad kaba khlain ban iada ia ka khyndew ka shyiap jong ngi, ki pud ki sam, ki marpoh khyndew, ka kolshor, ka ktien, ka khaii pateng bad kiwei kiwei. Ngi dawa na ka jylla ban mih da ki ain, ki polisi bad ki lad ki lynti ban kyntiew ia ka rep ka riang, ka pule puthi, ka khaii pateng bad ka roi ka par” u la bynrap.
“Ka HYC na ka por sha ka por ka ju pynbor ban pynrung ia ka ktien Khasi ha ki 8 tylli ki schedule bad ka council kan iai bteng ban bud ia ka jylla bad ka pdeng ban pynthikna ba ka ktien jong ngi kan ioh ia ka jingithuh kumba long kiwei pat ki jait ktien ka ri” ong u bah Synrem .
Haba phai sha ka jingma u drok ha ka jylla, u president ka HYC “Ka Council kan iai pynbteng ia ka thma pyrshah ia u drok ha ka jylla”.
U bah Synrem u la ong ba ka jingma u drok ym tang ba ka la pynsniew ia ki samla ha sor hynrei wat ha ki shnong ki thaw ha nongkyndong ruh.
“Tang ka jingkem ïa ki nongdie bad nongdih kan nym lah ban pynduhjait ïa ka jingma ïa u drok ha ka jylla. Ngi dawa na ka sorkar jylla ban buh ia ki Rehabilitation Centre ha man la ki district jong ka jylla, ban sumar ia ki samla ka ban iarap ia ki ban kylla sla thymmai” ong u bah Synrem.
U bah Synrem u la ong ba ka sorkar jylla ka dei ban peitngor tyngeh ia ka jingtuid jong u drok ha ka jylla bad ruh ban pyntreikam ia ki ain kiba tyngeh tam ban pynshitom ia kiba donkti ha ka jingkhaii drok.
Ha kane ka sngi, ka HYC ka la pynkupburom iaka nongioh khusnam Padmashree, ka kong Silbi Passah bad iaki samla pule na kylleng ka thaiñ Khasi-Jaiñtia kiba wan shakhmat haki eksamin.
