Nongpoh, Jymmang 18: Ka Committee ki Nongrep na Ri Bhoi District, kala rai ban sa pynmih biang ia ka bynta kaba ar (part-II) jong ka phlim ki Nongrep, kaba la ring dur beit thik tang shaphang ka rep ka riang.
Kane ka Committee bala ialam da u Bah SB Sban Khongjoh, kala shim ia kane ka sienjam halor ka nongrim ba ka Committee ka shim ba ka rep ka riang ka dei tang kawei na ka lad ban kyntiew iaka ioh ka kot jong ki nongrep ha ka District bad ha ka Jylla hi baroh kawei.
Kane ka rai kala mih ruh namar ka jingkwah ban pynbteng ia ka bynta ba nyngkong jong ka phlim (part-I), kaba hikai shaphang ka rep ka riang ia kaba la buh ruh ha Youtube Channel ban ai jingmyntoi ia ki paid Nongrep.
Kum shibynta ban pynkhreh ia kane ka phlim part-II, ka Committee kala shong jingialang ha ka 15 tarik Jymmang ha Pahamrioh. La pyntip ba ha kane ka phlim yn iashimbynta da ki Nongrep ki ban pyni ia ka rep ka riang kat kum ka juk ba mynta bad kat kum ki jinghikai ba ki la ioh.
“Haduh kine ki sngi dang don bun kiba dang kheiñ sting ïa ka kam rep ka kam riang bad kim ju poi pyrkhat pat ba ha ka jylla kiba bun hi ki dei ki nongrep bad lada ngim lah ban kyntiew ïa ka rep ka riang kumno ngin lah ban pynim ja ïa lade bad ïa ka ïing ka sem” ong u Bah Khongjoh haba iakren bad ka Shlem.
