Shillong, Nailur 25 : Ka Bharatiya Janata Party (BJP)-Meghalaya kala rai ban leit iakynduh ia u Myntri Rangbah ka Assam Himanta Biswa Sarma ban phah tuklar lem ha kaban pynthikna ba kan ym don ka jingiakajia hapdeng ki Jaidbynriew ba sah ha khappud.
Ka jingiakajia bad jingiapynbi bor ha ki shnong khappud jong baroh artylli ki Jylla kila nang kiew wat hapdeng ka jingiakren iapynbeit pud hapdeng ka Sorkar Meghalaya bad Assam.
Tang ha kine ki arsngi, kawei ka jingiakajia kala mih hapdeng ki trai shnong bad ki Pulit ka Assam kiba kwah ban pynpra ia ka topum ba dang shu shna ha shnong Barapathar, kaba dang hap hapoh ka Ri-Bhoi District. Ka Dorbar Shnong lem bad ka Trai Jaka kila mudui da ka ejahar halor kane ka jingjia.
Haba kylli ia ki sienjam bala shim da ka BJP Meghalaya ban pynkut noh ia kine ki jingiakajia baroh, u bah Ernest Mawrie, President ban sa leit noh jong ka Meghalaya BJP ula ong ba ka party kala kyrpad ban iakynduh ia u Myntri Rangbah ka Assam Himanta Biswa Sarma khnang ban ioh iakren bad iapynbeit ia kine ki jingiakajia.
Hynrei u ong, namar ka jingbun kam jong u Myntri Rangbah ka Assam, ym shym la lah ban pynbeit ia ka por bad Tarik. U ong ba ka Party kan sa buddien ia kane ka kam ban ioh iakynduh ia une u Khliehduh ka Assam.
U Bah Ernest u pyntip ruh ba ka Party kala dep pyntip ia kane ka jingjia sha u Myntri Rangbah ka Jylla Conrad K Sangma.
-Meghalaya kala rai ban leit iakynduh ia u Myntri Rangbah ka Assam Himanta Biswa Sarma ban phah tuklar lem ha kaban pynthikna ba kan ym don ka jingiakajia hapdeng ki Jaidbynriew ba sah ha khappud.){kind=link}