Shillong, Nailur 14: Ka Khasi Hills Autonomous District Council (KHADC) bad ka Karbi Anglong Autonomous Council (KAAC) kila shim iaka rai ban iatreilang bad wanrah ia ka jingshongsuk bad ban pynneh pynsah iaki riti dustur jong ki nongshong shnong khappud ka Jylla Meghalaya bad Assam.
Ia kane la pyntip da u Chief executive member (CEM) ka KHADC) bah Pyniaid Sing Syiem hadien bala wai ka jingialang hapdeng ki nongialam ka KAAC haka jingdonlang u Member of Parliament (MP) ka Karbi Anglong u Horen Singh Bey, u CEM ka KAAC u Dr. Tuliram Ronghang lem bad ki 12 ngut ki executive member (EC) ka KAAC.
Haba kren sha ki lad pathai khubor u bah Pyniaid ula iathuh ruh ba haka jingialang, ki 2 tylli ki district council kila mynjur ban iatreilang ban wanrah ka jingshong shngain hapdeng ki nong shong shnong ka Meghalaya bad Assam khamtam haki thain khappud.
U bah Pyniaid ula iathuh ba kum u CEM ka KHADC ula pynsngew ha ki nongialam ka KAAC ban ai jingiada iaki Khasi-Pnar kiba sah ha Block II katba ka jingiakren pynbeit pud hapdeng ka sorkar Meghalaya bad Assam.
“Naduh hynnin ka sngi, nga la pynsngew shaki nongialam ka KAAC khamtam sha u CEM ban pynthikna ba ki Khasi-Pnar kiba sah ha Block II kim dei ban shah pynthut katba ka jingiakren pynbeit pud hapdeng ki artylli ki sorkar jylla ki dang iaid” la ong u bah Pyniaid.
U bah Pyniaid ula ong ba ka Executive Committee (EC) dangshen kala leit jurip iaki Khasi-Pnar ba sah ha Block II bad la shem ba ki don 23 tylli ki shnong Khasi-Pnar.
Haba kylli halor ka jingdawa ban pynphai biang iaka Block II sha Meghalaya, u bah Pyniaid ula ong “Ka jingiakren hapdeng ki arylli ki sorkar jylla lyngba ki Regional Committee jong ka Meghalaya-Assam ka dang iaid bad ka KHADC ruh ka don bynta ha kane ka phang”.
“Ia kane ka rai yn sa shim ka sorkar jylla haka jingiakren bad ka sorkar Assam bad ka rai ba ki artylli ki sorkar jylla kin shim kan dei beit katkum ka jingkwah ki paidbah kiba shah ktah khamtam kito kha don ja khappud” ula ong.
