Shillong Nohprah 09: Ki pulit jong ka Laitumkhrah Police Station kila bat ia ki 3 ngut ki samla kiba la donkti ha kaban niah khlem akor kaba la tynrah ia ka kynroh maw ha Laitumkhrah Police Point ha ka shiteng synniang jong ka 1 tarik u Nohprah.
U Superintendent of Police City u Bah Vivek Syiem ula pyntip ba kawei ka kali Maruti 800 ka bym shim la don ia u Registration Number, lyngba ka video kaba la ioh ring, kala don ka jingniah khlem akor bad la pynher sted bha bad ka jingpynheh ia ka jingtem bad hadien kane, u nongniah jongka kali ula leit tynrah ia ka kynroh maw ha Laitumkhrah Police Point.
Kane ka jingjia kala saphriang lyngba ka video bad ki pulit kila rejistar Suo-Moto case ia katei ka jngjia lyngba ka Laitumkhrah Police Station vide No. 105(12)2023 hapoh jong ka Section 279 of IPC bad kiwei kiwei ki kyndon jong ka Motor Vehicle Act.
Ka jingsaphriang katei ka Video ha ki rynsan Social Media kala pynlong ruh iaka Laitumkhrah Dorbar Shnong Pyllun ban ujor da ka ejahar ha Laitumkhrah Police Station bad kumta la shim noh ia katei ka ejahar kum ka Supplementary FIR namar ba la dep ban rejistar shwa ia ka suo-moto FIR.
U Bah Vivek ula pyntip, ba ha ka jingtohkit ka kynhun ki pulit hapoh ka jingialam jongu OC ka Laitumkhrah kila lap ia katei ka kali na ka karkhana shna kali kaba don ha Laitkor Kyntonmon.
Ki pulit kila ioh bat ia ki 3 ngut ki samla ha kaba kila phla ba kila pynher ia katei ka kali hadien ba kila shoh khawiang bad la shem ba katei ka kali kadei kaba don ia u number ML05 U 4845.
Ia kitei ki 3 ngut ryngkat bad ka kali la wan ialam noh sha Laitumkhrah Police na ka bynta ban pynlong ia ka jingkylli bniah bad ban leh ia kaba donkam katkum ka aiñ.
Ki pulit kila kyntu ia ki samla ba kin long kiba adkar bad ban ym leh ia ki ‘Stunt’ ne ban pynher sted ia ki kali ym tang ba kin buh ia ka jingim lajong ha ka jingma hynrei wat ia kiba iaid ba ieng ruh kumjuh bad la kyrpad ruh ia ki paidbah ba lada ki iohi ia kum kitei ki jingjia ki dei ban pyntip sha ki pulit da kaba phone ha u 112.
