Shillong, Nohprah 18: Uwei dkhot ka Khasi Students’ Union (KSU) hynne ka sngi U Blei u la ieng ha rud surok ryngkat bad ka Placard ban pyni sha u Myntri Rangbahduh ka ri Narendra Modi katba u dang iaid lynti da ka kali ha ki thain IGP Shillong.
Une u dkhot ka KSU u la rah iaka placard ban pyni sha u Modi halor ka jingdawa pyntreikam Inner Line Permit (ILP) ha Meghalaya.
“Sha u Myntri Rangbahduh, pyntreikam ILP, weng noh iaka CAA & Indo-Nepal Treaty, pynurlong iaka Central Agricultural University, ithuh noh iaka ktien Khasi hapoh ka khyrnit ba phra ka riti synshar bad ban pynbeit noh ia u pud u sam” la thoh ha ka pla kad.
Naka liang u general secretary ka KSU u samla Donald V Thabah u la ong ba ka seng kam banse ban rah placard ban pyni sha u Myntri Rangbahduh ka ri namar ka jingbym ioh lad ban kynduh markhmat bad u watla u la wan ha Shillong.
U samla Donald u la iathuh ba ka seng naduh 2020 kala dep ban phah dorkhas haba iadei bad ki mat jingdawa.
Lah ban kdew ba u Myntri Rangbahduh ka ri India u Narendra Modi mynta ka sngi u la wan shim bynta ha ka jingrakhe dap 50 snem ka NEC ha Shillong.
