Nongpoh, Naitung 29: Ka kynhun ialehkai football jong ka Thad Football Club ka la ioh rah ia ka nam kum ka lahduh da kaba pynliem noh ia ka kynhun jong ka Warrior Umran Diary da 1-0 ha ka lympung ialehkai football kaba la pynlong da ka Umsning Sport & Cultural Club.
Ha ka jingiakhun ia ka phainal, la sakhi ia ka jingiakhun hapdeng ki ar kynhun kaba la iakhaid bormet bha bad kaba itynnad kaba la pynshongshit ruh ia ki paidbah nongpeit kai kiba la wan ban sakhi ia ka jingiakhun bad ban kyrshan ia la ka kynhun hynrei tad haduh ba kut noh ki ar kylla, ka kynhun jong ka Thad Fc ka la lah ban pynkhih ia ka jar jingjop da 1 kol bad ban pynliem noh ia ka Warrior Umran Diary da 1-0.
Ia kane ka lympung ialehkai football jong ka US&CC la wan ban pynhap pyrda noh da u Bah Rayonald Kharkamni, President ka Ri Bhoi District Cricket Association kum u kongsan ha ka jingiadonlang ruh, u samla James H. Mawphniang, General Secretary ka KSU, North Khasi Hills, kiwei kiwei ki riew pawkhmat nalor ki nongkitkam jong ka Umsning Sport & Cultural Club.
Haba ai jingkren ha ka jingpynhap pyrda noh ia ka lympung ialehkai football jong ka USCC, u Bah Rayonald Kharkamni, kum u kongsan u la pynpaw ia ka jingkmen ban ia donlang ha kane ka sngi ba la pynhap pyrda noh ia ka lympung ialehkai football kaba la long kum ka rynsan ban ailad ia ki samla donsap ban iashimbynta ban sei ia la ki sap ki phong ialehkai football kaba dei ruh ka kam ialehkai sport kaba la pynim jakpoh ia kiba bun ki rang bad ki thei ialehkai football jong ka jylla Meghalaya.
Kum u wei u nongkitkam ka Cricket Association ha Ri Bhoi District, u Bah Rayonald Kharkamni, u la ai khublei kyrpang ruh ia ki nongialam ka Umsning Sport & Cultural Club kiba la ai ia ka jingiatreilang ha kaban ai ia ka jaka ban pynlong kum ka jaka pyntbit (net practise) ha ka kam ialehkai cricket ka thain Umsning kaban long shisha ka jingmyntoi na ka bynta kito ki samla kiba donsap ialehkai kriket bad kiba angnud ban kiew ha kane ka kam ialehkai sport.
“Kum ki nongialam jong ki Sport Association, ngi don shisha ia ka jingkitkhlieh kumno ban kyntiew ia kine ki kam ialehkai sport bad ruh ban plie ia ki lad ki lynti ban plie lad ruh ia ki samla donsap ban ioh ia ka rynsan ban pyntbit bad ban kiew shuh shuh ia la ka sap ka phong bad ruh ban long briew man briew lyngba kine ki sport”, ong u Bah Kharkamni.
Pule ruh: Sdang ka Conference ka CPA ha Shillong, kynmaw u Om Birla ia ki synniang u Purno A Sangma
