Nongstoiñ, Naitung 7: Ka lympung West Khasi Hills District Level Subroto Mukherjee Cup Football Tournament 2023, kaba la neh kumba 10 sngi, ka la poi noh sha kaba kut hynne ka sngi thohdieng ha madan ïalehkai kaba ha Mawkadiang.
Ha kane ka lympung ba mynta u snem, ki don kumba 37 tylli ki skul bapher bapher hapoh ka District, kiba la shim bynta. Hynrei, napdeng kine ki skul ka Sib Singh Memorial Government Higher Secondary School bad ka St Peter’s Higher Secondary School kiba na sor Nongstoiñ, ki la khur ïa ka nam kum ki lahduh.
Ha ka liang ki shynrang jong ki Under-17, ka Sib Singh HSS ka la pynliem pyrshah ïa ka JJM Nicholas Roy da shi kol la nod. Ïa kane ka kol la thep da u Pynbianglang Kharsyntiew ha ka minit kaba 15.
Kumjuh ruh ha ka liang Under-17 ki kynthei, ka Sib Singh HSS ka la pynliem ïa ka BBC SS Steplanglur da shi kol la nod, ha kaba ka Ibadondor Nongsiej ka la thep ïa ka kol ha ka minit kaba 26.
Katba ha ka Under-14 jong ki khynnah shynrang, ka St Peter’s HSS ka la pynliem ïa ka St Anthony’s SS da shi kol la nod. Ïa kane ka kol la thep da u Banshanskhem Nongphud ha ka minit kaba 54.
Da kine ki nam jop ka Sib Singh HSS bad St Peter’s HSS, kin pynkhreh pat ïalade mynta na ka bynta ka State Level, ïa ka ban sa pynlong shen ha nongbah Shillong.
Hadien ba la kut ki jingïalehkai la ïoh ruh ban sam ïa ki khusnam bapher bapher, kata ka khusnam Best Player (Under-17 Girls) sha ka Helendamary Thabah jong ka BBC SS Steplanglur. Katba ha ka liang ki shynrang (Under-17) la khur da u Pynbianglang Kharsyntiew jong ka Sib Singh HSS. Katba u Bankiew Lyngdoh jong ka Nongstoiñ Public School u la khur ïa ka nam Best player ha ka kyrdan Under-14.
Nalor ka District Sports Officer Kong Balarina Syiem, la donlang ruh u kongsan Bah R.G Momin MLA ka Rambrai Jyrngam bad kiwei kiwei ki kynrem ki lyndan. Na ka liang kine ki heh ki haiñ, ki la shim ruh ïa ka bynta ban sam ïa ki khusnam sha ki nongïalehkai ha ki kyrdan bapher bapher.
Pule ruh: Ujor ka HNYF sha u SP ba iai shah thombor ki paidbah ha ka thain Block-II
