Shillong, Jylliew 17: Ka Randajied United Football Club (RUFC) kala rah ia ka nam lahduh jong ka Meghalaya State League 2023 da kaba pynliem iaka Khliehmawlieh Youth Club da 1-0 ha ka phainal kaba la long hynne ka sngi saitjaiñ ha SSA Stadium, First Ground, Polo.
Ka jingiakhun jong kine ki ar tylli ki kynhun kala long kaba itynnad bha ha kaba ki rangialehkai kila sei iala ka sap ka phong bad iala ka bor ka sor ban iakhun dohiap ban iohrah ia ka nam lahduh jong ka MSL hadpeng ka jingwan ai jingkyrshan jong ki paidbah na kylleng ki bynta jong ka jylla.
U Wanlamsuk Nongkhlaw jong ka RUFC ula thep iaka kol ha ka minit kaba 9 jong ka kylla step bad lyngba kane ka kol ka RUFC kala ioh syndon ban khur ia ka jingjop.
Ia kane ka jingiakhun iaka phainal la wan ban sakhi da u Symbud Myntri Rangbah ka jylla u Bah Sniawbhalang Dhar, u Nongaibuit jong u Myntri Rangbah ka jylla u Bah Hamletson Dohling, u Additional Chief Secretary u Dr P Shakil Ahammed, ka Deputy Commissioner ka East Khasi Hills Kong RM Kurbah, ka Secretary ka tnad Sports and Youth Affairs Kong R Sohkhlet, u MLA barim bad u nongialehkai barim jong ka India u Bah Eugeneson Lyngdoh, ki nongialam ka Meghalaya Football Association bad kiwei kiwei.
Ka Khliehmawlieh watla kala shah thep shi kol mar syn dang hynrei kam shym la duh jingkyrmen hynrei kala iakhun dohiap tangba watla kala ioh ia ki katto aktne ki kabu hynrei kam shym la lah ban thep ia ka kol bad ki rang ialehkai shadien jongka Rangdajied kila ialehkai bha ban ym ailad ia ki rangialehkai ka Khliehmawlieh ban ioh ban thep kol.
Ha ka por ba la kut ka kylla step, la sam iaka ‘Cheque’ kaba T.2 Lak sha ki Associations kiba pyniasoh bad ka MFA ha kaban pynlong iaka jingialehkai phutbol ha ki thain jongki bad kane kadei kum shi bynta jong ka jingshimkhia ka MFA bad ka sorkar jylla ban pynbiang ia ki jaka ialehkai ha baroh ki district jong ka jylla.
Ki Club kiba la ioh rung ban iakhun ia ka MSL kila iohpdiang mar T.1 lak bad kiba ioh rung sha ka semi phainal kila ioh sa T.1 Lak, ka Khliehmawlieh kaba la wan Baar kala ioh ia ka cheque T.3 lak katba ka Rangdajied kala ioh T.5 lak kum ka lahduh jong ka MSL.
U Donlad Diengdoh jongka Mawlai SC ula ioh iaka khusnam Golden Boot da kaba thep 15 kol, arngut ki rangialehkai ka Rangdajied kiba kynthup ia u Banshanlang Sten ula ioh iaka Golden Glove kum u nongap kol bat bit tam bad u Tremiki Lamurong ula ioh ia ka khusnam Golden Ball ne u nongialehkai uba kynsai tam ha ka MSL.
U Bah Sniawbhalang Dhar ula aiti ia ki khusnam jongka MSL ha ka RUFC kaba la long ka lahduh ha ka lympung ialehkai Football.
Pule lang ia kane: Bteng biang ka jingiakynad haka jylla Manipur
