Shillong, Kyllalyngot 12: Ka long ka jingsngew sarong ia ka jylla Meghalaya, kaba la ioh ban rah ia ka nam kum ka lahduh lyngba ki samla ialehkai Karate, haka lympung ialehkai Kanninjuku Training Camp-cum-National Shoto Cup Karate Championship 2023.
Ka Meghalaya kaba la ioh khur haduh 109 tylli ki Takma kiba kynthup 45 tylli ki takma Ksiar, 37 tylli ki takma Rupa bad 27 tylli ki takma Rnong.
Ka All Meghalaya Karate-Do Association kala phah 57 ki nongialehkai karate hapoh ka jingialam u Bah Donboklang Lyngdoh, Arjun Sewa bad u Bah Greater EM Kharpuri, sha katei ka lympung kaba la long ha ka 29-31 tarik u Nohprah 2023 ha Khandala, Maharashtra.
Baroh kitei ki 57 ngut ki nongialehkai kila ioh ban khur mar kawei ka takma katba u Gideon Tympuin, Paul Danny Kharmudai bad u Glikerius Buhphang kila ioh khur mar 3 tylli ki takma Ksiar.
