Shillong, Naiwieng 16: Ka Jylla Manipur kala ioh rah ia ka nam lahduh ne Overall Champion ha ka lympung ialehkai 2nd North East Olympic Games da ka jingioh khur haduh 88 tylli ki takma ksiar, 75 tylli ki takma rupa bad 77 tylli ki takma rnong.
Ka Manipur kala lah ban pynneh ia ka painsngait kum ka lahduh jong ka North East Olympic Games ba long ha u snem 2018.
Ka Assam kala wan ha ka kyrdan kaba ar da ka jingioh khur 79 tylli ki takma ksiar, 61 tylli ki rupa bad 63 tylli ki takma rnong.
Ka Arunachal Pradesh kala ioh bat ia ka kyrdan kaba lai da ka jingjop haduh 39 tylli ki takma ksiar, 36 tylli ki rupa bad 37 tylli ki rnong.
Ka Jylla Meghalaya kala kham kiew ha kane ka kynti ba mynta bad kiew naka kyrdan ba hynriew ha u snem 2018 sha ka kyrdan ba 4 ha kane ka kynti.
Saw snem mynshuwa, ka Jylla kala jop tang 3 tylli ki takma ksiar hynrei mynta kala pyndep ia kane ka lympung da 36 tylli ki takma ksiar kaba long haduh 12 shah, lem bad 35 tylli ki takma rupa bad 78 tylli ki rnong.
Ki kynrem ki lyndan kiba la iadon ha kane ka sngi pynkut ki dei u Kongsan uba dei u Chief Patron ka Olympic Games bad Myntri Rangbah ka Jylla Conrad K Sangma, u Myntri kam ialehkai Bah Banteidor Lyngdoh, ki Myntri Sorkar, ki Heh Ophisar bad kiwei kiwei.
U Myntri Rangbah ka Jylla ula aiti ia ka trophy overall champion sha ka Manipur bad runners-up sha ka Assam bad ka Third Place sha ka Arunachal Pradesh. Ia ka lama jong ka NEOG la aiti noh sha u Bah JF Kharshiing, uba la aiti sha u Chef de Mission ka Nagaland, u Neilyalie Angami, ka ban sa ioh ban pynlong ia ka NEOG ban wan.
“Nga ai khublei ia iwei pa iwei napdeng jong ki” ong u Conrad ha ka jingialang sam khusnam. Ula ong ba kine ki North East Olympic Games kila kyntiew ia ka jingpynkhreh ha ka long ki jingtei bad kiwei kiwei hynrei ka jingialehkai jong ki rang bad ki thei ialade kala long kaba kynsai bha.
“ Nga da sngew sarong ba ngi ioh ban pynlong ia kane ka lympung ha kane ka kyrdsna kaba lah ban ianujor bad kiwei ki lympung hapoh ka Ri. Kane kala urlong namar baroh kila iatreilang kum ka kynhun. Kine ki lympung kila pynshisha ba lada phi iatrei kum ka kynhun bad aiti ialade ha ka kam, kam don satia kano kano ka bym lah ban long”.
U Myntri kam ialehkai ula ong ba ka Meghalaya ka don ha ka jingpynkhreh sa ia kawei ka lympung ialehkai kaba heh bha ha ki snem ban wan. Ula ong ka jingkhublei ia ki lai tylli ki Jylla bad iaroh ia ki nongialehkai ka Jylla khamtam ka kynhun Athletic kiba la ioh rah ia ka nam lahduh ha ka Athletic.
