Nongstoiñ, Nailar 6: Ka lympung 38th Meghalaya State Badminton Championship 2023 ba la pynlong da ka West Khasi Hills District Badminton Association ryngkat ka Meghalaya State Badminton Association, ka la poi noh sha kaba kut ha ka sngi saitjaiñ ha Indoor Stadium Nongstoiñ, ha kaba ka kynhun na East Khasi Hills ka la khur ïa nam kum ka lahduh napdeng ki kynhun baroh.
Ka nam lahduh kala leit sha ka East Khasi Hills hadien ba ka la jop bun eh, kata haduh 15 tylli ki nam lahduh. Nangta phra tylli ki khusnam ba ar lane runner’s up.
Ha ka kyrdan ba ar lane kaba bud pat la ïoh da ka West Khasi Hills, kaba la ïoh ban khur ïa saw tylli ki nam lahduh bad saw tylli ki khusnam ba ar.
Katba ha ka kyrdan ba lai la ïoh da ka West Jaiñtia Hills kaba khur lai tylli ki nam lahduh bad hynriew tylli ki khusnam ha ka kyrdan ba ar.
Lah ban kdew hangne ba kane ka lympung ha Nongstoiñ kaba la neh kumba katto katne sngi, la lah ban pynkut noh ha ryngkat ka phuh ka phieng, ha kaba u MLA na Rambrai Jyrngam u Bah R.G Momin u la long u kongsan ban pynhap noh ïa ka pyrda.
Nalor u kongsan, la donlang ruh da kiwei kiwei de ki heh ki haiñ ba kynthup ïa u Deputy Commissioner ka West Khasi Hills Bah Garod LSN Dykes, Bah H.K Thabah Additional Deputy Commissioner kum u shongknor ka organizing committee, I District Sports Officer West Khasi Hills kong Balarina Syiem, ki dkhot ka Meghalaya State Badminton Association, kumjuh ruh ki heh ki haiñ na ka West Khasi Hills District Badminton Association bad kiwei kiwei, kiba la ïoh ruh ban sam ïa ki khusnam bapher bapher.
Kumjuh ruh, lah ban pynpaw hangne ba ha kane ka lympung jong ka jingïalehkai Badminton mynta u snem, la wan ban ïashimbynta da ki 9 tylli ki District kiba don hapoh ka jylla Meghalaya kynthup ruh kawei ka Club. Baroh ki nongïalehkai ki la kot haduh 229 ngut kynthup ïa ki Kynthei bad ki Shynrang bad ha katei ka lympung ka jingpynïalehkai ka long kumba 307 tylli ki jingïakhun.
