Shillong, Nohprah 17: Ka 29th State Karate Championship kala kut haka 17 tarik mynta u bnai bad ka kynhun ialehkai ka East Khasi Hills kala khur ia ka nam Overall Champion ha ka liang ki kynthei bad shynrang.
Kane ka lympung ialehkai ba arsngi kala kut ha JN Indoor Stadium Polo ba pynlong daka All Meghalaya Karate-Do Association (AMKA) lyngba ka jingkyrshan daka tnat Directorate of Sports and Youth Affairs ka Sorkar Meghalaya.
Ki don haduh 372 ngut ki nongiakhun karate lane ki karatekas kiba naduh hapoh 10 snem haduh ki rangbah kiba la wan shim bynta na kylleng ka Jylla.
Ki kongsan ha kane ka sngi ko kynthup Prof Dr C Daniala, Medical Superintendent ka NEIGRIHMS ha ka jingiadon ryngkat ki dkhot ka liang ka Meghalaya State Olympic Association (MSOA) kata u General Secretary u Bah Finely L Pariat, MSOA Executive Council Member u Bah Dipshon Ryntathiang bad Deputy Chief Accounts Officer jong ka MeECL u Bah Aiborlang Shabong.
Ka jingiakhun ka long kaba itynnad ha kaba ki karatekas kila pyni iala ki sap kynthup ka kata (form) bad ka kumite (sparring) ha kaba kila pyniap biej iaki nongpeit kai kynthup ki kmie iaki kpa.
Ka Ri-Bhoi kala wan ba ar na ki shynrang katba ka West Jaintia Hills kala wan ba ar ha ki kynthei.
Iaka nam Best Karateka haka liang ka Boys’ Division la ioh da u Hymnson Challam ka West Jaintia Hills bad ula ioh gold haka thup Boys’ 13 Years kumite event.
Iaka Best Karateka haka thup men’s division la ioh da u Paul Danny Kharmudai ka East Khasi Hills bad ula ioh ar tylli kingold medal haka thup Men’s +60kg kumite bad Men’s Open kata events.
Haka liang girls’ division iaka nam Best Karateka la ioh daka Kimjonlhing Silthou ia East Khasi Hills bad kala ioh gold medal haka Girls’ 8 Years kumite.
Ka Rebeka Nongspung ka East Khasi Hills kala ioh ar tylli ki gold medal haka liang Women’s -50kg kumite bad Women’s Open kata.
Ki karatekas kin iai bteng ban kilan met naka bynta ka 5th Meghalaya Games ka ban long ha Tura bad ki don ruh ki ban iakhun shaki tournaments sha bar ka Jylla.
Ka AMKA kala sei palat 200 karatekas kiba la ioh medal haki rynsan national bad international naduh bala seng iaka AMKA.
