Nongpoh, Iaiong 30 : Ka kynhun ialehkai Dubakh jong ki kynthei bad ka SYM jong ki Shynrang, kila ioh ban rah ia ka nam lahduh ha ka lumping ialehkai 3rd Berchem Cup Open to All Basketball Tournament 2023 bala pynlong da ka Seng Samla Nongpoh Proper.
Ha ka jingialehkai ki Kynthei, ka kynhun Dubakh kala pynliem ia ka kynhun SYM da 57 la 40 basket katba jong ki Shynrang, ka SYM kala pynliem ia ka Nongpoh Proper da 80 la 56 basket ha ki jingiakhun phainal ba la pynlong ha madan ialehkai ha Sajer.
Ïa katei ka lympung la wan ban pynhap pyrda noh da u Bah Mayral Born Syiem MLA ka Nongpoh kum u kongsan haka jingdonlang u Bah Ferynald K. Kharkamni President KSU NKHD u Bah Luistar Lyngdoh President FKJGP NKHD, u Bah Marcus Marten President HNYF Northern Region, u Samla Lumlang Shylla President Seng Samla Nongpoh, ki nongïalam shnong ki nongïalam raid, lem bad ki paidbah kiba la wan ban ai jingkyrshan ïala ki kynhun.
Ka Dubakh kum ka kynhun laduh haka liang ki kynthei kala ioh ban khur ïaka song pisa ba 25 hajar lem bad ka trophy, katba ka khynun SYM kum ka kynhun ba wan ba ar kala ioh rah ïaka song pisa kaba 10 hajar lem bad ka trophy.
Haka liang ki shynrang ka kynhun SYM kaba la ioh rah ïaka nam laduh ka la ioh ban khur ïaka song pisa kaba 50 hajar lem bad ka trophy, katba ka Nongpoh Proper ka khynhun ba wan ba ar kala ioh rah ïaka song pisa ba 20 hajar lem bad ka trophy, ryngkat kiwei kiwei ki khusnam shimet bala sam da u kongsan bad ki riew rangbah ha katei ka sngi.
