Shillong, Rymphang 27 : U Symbud Myntri Rangbah ka Jylla Bah Sniawbhalang Dhar ha ka sngi Palei, ula ieng ban pynpaw ka jingpyrshah ia ka jingkdew u nongialam ka VPP Ardent M Basaiawmoit tang ia ka kyntien “Khasi” ha ka jaka “Khasi-Jaintia” ha ka jingiatai halor ka kaiphod ka Expert Committee halor ka Reservation Policy myn ha ka 25 tarik Rymphang.
U Lamphang ula ai ka rai ba ka jingbuh jingthoh ia kaei kaba la iatai ha ka Iingdorbar, ka dei ban pynneh ia ka kyntien “Khasi bad Jaintia”.
“Nga wanrah ia ka mat pyrshah halor ka jingkren jong u dkhot na Nongkrem….u dkhot ula kdew ia ka kyntien “Khasi” bad kam shym kynthup lang ia ka Jaintia. Kumba baroh ngi tip ba ka Reservation Policy, kala buh ia ka bhah ba kyrpang ia ki Khasi bad Jaintia” ong u Bah Sniawbha haba kyntu ia u Lamphang ban buh ha ka jingthoh ba dei ban pyndonkam beit ia ka kyntien Khasi Jaintia.
U Bah Ardent ula pynksan ia ka jingjied jong u ban pyndonkam ia kane ka kyntien bad ong “Nga khmih lynti ba u Symbud Myntri Rangbah un long rangbah bha ha kaban sngewthuhhaba nga ong Khasi..Nga tip kiei ki Khasi….Nga ju pyndonkam beit ia ka ktien “Khasi” namar nga kwah ban pyniatylli ia ka Jaidbynriew…Ngi long kawei kum ka imlang sahlang bad ngi dei kawei kum ka Jaidbynriew” ula ong haba bynrap ba um don satia ia kano kano ka jingmut kaba sniew bad khlem khmih lynti ba u Myntri un kran ia ka mat hapoh ka Iing.
Haba bynrap ia ka jingkren u Bah Sniawbha, u Myntri ka Koit ka Khiah Bah Wailadmiki Shylla ula pynpaw ba ka Notification 1972 kala pynpaw shai ia ka kyntien “Khasi bad Jaintia”.
“Ngi wan hangne ym ban iakdew kti…kaei kaba la iakren kan ha ki jingbuh jingthoh….ngi kwah tang ban pynbeit ia kaei kaba iakren, ngim kwah ban pyniapait iapra” ula ong.
U Bah Ardent ula iai ban ba ula pyndonkam khang ia ka kyntien “Khasi” ban khanglad ia ki bor ba nabar ba kin phiah ia ka Jaidbynriew.
Haba ai ia ka rai, u Lamphang Thomas A Sangma ula ong “Kat kum ki jingthoh, la ju kdew beit ia ka kyntien Khasi bad Jaintia ha ka Reservation Policy, kumta nga pynbeit ia kane ka jingkren”.
