Guwahati, Iaiong 27: Ki nongshong shnong kiba shong ba sah ha ki thain khappud ka Arunachal Pradesh ki la pynpaw ka jingpyrshah ha kaba iadei bad ka jingiateh ba la ia soi bad ka Assam ha ka 20 tarik mynta u bnai na ka bynta ban pynkut noh ia ki kam iakajia pud kiba la neh da ki phew snem mynta.
Na ka liang u Myntri Rangbah (CM) ka Assam u Himanta Biswa Sarma bad u CM ka Arunachal Pradesh u Pema Khandu ki la ia soi ia ka Memorandum of Understanding ha ryngkat ka jingiadon lang u Myntri kam pohiing ka sorkar India u Amit Shah da ka jingthmu ban pynkut noh ia ka jingiakajia pud kaba la leh kumba 50 snem mynta kaba iadei bad ki 123 tylli ki shnong kiba don ha ki jaka khappud ba 804 kilomitar hapdeng kine ki ar jylla.
Ka Tirap, Changlang bad ka Longding People’s Forum (TCLPF) ki la byrthen ban leit sha ka iingbishar halor kane ka jingiateh kam khappud kaba shah liang kaba long pyrshah ia ki nongshong shnong jong ka Tangsa ka Arunachal kiba shong ba sah sha ki bynta khappud ka Assam bad ki shnong kiba la shah ktah hapoh Changlang district.
Pule lang ia kane: Ujor ka NHPF ia ki arngut ki nong Assam ba kynnoh thok pisa ia ki paidbah
Katei ka forum ka la ong ruh ba ka commission na ka thain ba la thung da ka iingbishar Supreme Court ha u snem 2006 ka la pynlong ka jingleit jurip sha ki katto katne ki jaka hapoh Arunachal Pradesh hynrei kim shym la leit jurip ne pynlong kano kano ka sorbe hapoh Changlang district.
Ka Tirap, Changlang bad ka Longding ki dei ki district kiba don shakhmat eh jong ka thain mihngi ka Arunachal Pradesh.
Na ka liang ki nongshong shnong jong ki 13 tylli ki shnong na baroh ki arliang khappud ki la pynlong ia ka jingialang ha ka 24 tarik mynta u bnai ban pynpaw pyrshah ia katei ka jingiateh kam khappud hapdeng ka Assam bad ka Arunachal.
Kumta ruh, kane ka kdew shai ba kam shym la don satia kano kano ka jingkam ia ki shnong ki thaw na ka bynta ka Changlang bad Tinsukia district ha u snem 2007, pynpaw ka forum.
Katei ka commission jong ka thain ha ka kaiphot ka la pyni ha kaba iadei bad ka rukom pynphai ia ki jaka jong ki district lyngba ka notification jong u snem 1951, bad ia ki jaka ba la kam da ka Arunachal Pradesh lyngba ka jingtyrwa halor ka jingpyniabiang ia ki jaka khappud.Kumba 330 sq km ki jaka la pynkynriah na Changlang district shapoh Tinsukia district khlem kano kano ka jingmynjur jong ki paidbah nongshong shnong ka Changlang, ong shuh shuh ka forum.
Pule lang ia kane: Dawa ka KSU ban weng noh ia ki shipai BSF na shnong Amlarem
