Shillong, Iaiong 24 : Ki lai tylli ki Autonomous District Council –KHADC, JHADC bad GHADC-hynne ka sngi Nyngkong kila iai ban ia ka jingpyrshah jur halor ka jingpynrung ia ka kyntien ‘Unrepresented Tribe’ bad ‘Village Council’ ha ka jingtyrwa pynkylla thymmai ia ka Sixth Schedule jong ka Riti Synshar ka Ri India.
Hadien ka jingialang jong baroh lai tylli ki ADC ba long ha Shillong, u Chief Executive Member (CEM) ka KHADC Bah Titosstarwell Chyne ula ong ba ki lai tylli ki ADC kila iakren sani ia kane ka kam hadien ba ka Sorkar Pdeng kala pan biang ia ka jingai jingmut na ki.
“Ngi ieng pyrshah jur ban pyntreikam ia ka Unrepresented Tribe bad ka Sorkar Jylla ruh ka iadon ryngkat bad ngi. Haba iadei bad ka Village Council, ngi la ieng ha ka nongrim ba ha ka jaka jong ka, ngi tyrwa da ka Village Development Council” ong u Bah Titos.
Ula ong ba kine ki artylli ki kam ki dei kiba la sahteng namar ka jingdonkam ban hap iatai bniah bha.
Pule lang ia kane: Rai lang ki District Council ka Jylla ban pyrshah ia ka jingtreikam ka UCC ha Jylla
“Ngi la iatai sani bha ia kane ka kam. Ngi la pynsngew sha ki paralok jong ngi na Jaintia Hills bad Garo Hills ba ha KHADC, ngi la dep mynjur ia ka Village Development Council Bill bad ngi ngi kwah ruh ba kine ki artylli ki ADC ruh kim mynjur lang ia kane ka Bill khang ba ka Village Council kan nym treikam naba ngi don la ki jong ki Council” ong u Bah Titos.
“Namar, kat kum ka jingtyrwa ban pynkylla, ka jingpyntreikam ia ka Village Council ha ka Jylla kan sa pyntlot ia ka bor bad ka jingtreikam jong ki Dorbar Shnong. Ngim kwah ban iohi ba ki Dorbar Shnong jong ngi kin duh noh, ngi kwah ban iohi ba kin neh…ta ka daw ngi la rai ba ia kane ka kam ngin sa rah iakren shen hala ki jong ki Council” ula bynrap.
Nalor kane, ki lai tylli ki ADC kila rai mynjur ban pyrshah ia ka jingpyntreikam ia ka Swamitva Scheme da ka Sorkar Pdeng namar ka Jylla ka don iala ka jong ka riti bat khyndew.
Ha kajuh ka por, u CEM ka KHADC ula pyntip ba ki (ADC) la dawa ia ka Sorkar Jylla ban aiti biang ia ki kam ba iadei bad ka jingai ia ka Scheduled Tribe Certificate sha baroh ki lai tylli ki ADC kumba la leh ha ki snem bala leit noh.
“Ka jingai ia ki PRC da ki Deputy Commissioner ruh ka dei ka mat ba ngi la iakren. Ki bor District ki dei shuwa ban ioh iaka jingpynthikna na ki ADC shuwa ban ai ia kano kano ka PRC “ ula ong.
