Shillong, Iaiong 20: Ki 7 tylli ki shnong kiba don ha sawdong ka Nongkhyllem Wildlife Sanctuary Ri-bhoi District kila pynpaw ka jingpyrshah iaka Eco Tourism Infrastructural Project (ETIP) ba thmu pyntrei hapoh kane ka Sanctuary.
Ia kane la pyntip da u General Secretary jong ki 7 tylli ki shnong hapoh ka Raid Sohkhwai Bah Shanbor Rani.
Hashuwa kane, ka Synjuk jong ki 7 tylli ki shnong hapoh ka Raid Sohkhwai kala lum ia ka jingialang bad ka Greentech Foundation kaba lam khmat ban pyrshah iaka jingthmu jong ka tnat Tourism ban pyntrei iaki project bapher bapher hapoh Nongkhyllem Wildlife Sanctuary Ri-bhoi District.
La kam ba ka Sorkar Jylla lyngba ka tnat Tourism kala aiti shaka Company E factor Experiences Limited ban pyntrei iaki project hapoh ka Nongkhyllem Wildlife Sanctuary kynthup ki Hotel ne Resort, Skywalk, Water Sport Arena bad kiwei kiwei ki Project haka jinglut kaba ym duna T.26.30 klur.
Haba kren shaki lad pathai khubor u Bah Shanbor Rani u la ong ba ki nongshong shnong ha sawdong jong kane ka Wildlife Sanctuary, kim pyrshah iaki kam pynroi baka Sorkar ka thmu hynrei ka jingpyrshah kadei ba ka Sorkar ka mut wanrah iaki Project hapdeng ka Nongkhyllem Wildlife Sanctuary.
Ula ong ba ka jingpyntrei Ia bun tylli ki project hapdeng ka khlaw kan pyndik bad pynwit iaki mrad, ki sim, ki doh ba don hapoh kane ka Wildlife Sanctuary.
“Ngi sngew kyndit baka Sorkar ka mut wanrah iaki Project hapdeng khlaw jong ka Nongkhyllem Wildlife Sanctuary. Balei ka Sorkar kam wanrah ia kine ki juh ki project ha kiwei ki jaka ne ki shnong ba marjan jong kane ka Sanctuary” ong u Bah Shanbor.
U Bah Shanbor u la ong ba ka jingdon jong kane ka khlaw ym tang ka ai jaka sah iaki mrad hynrei ka ai shibun ka lyer kaba khuid ban ring mynsiem ki nong shong shnong ka thain khamtam namar ka Byrnihat kadei ka jaka ba jaboh tam.
U General Secretary ka Synjuk ki 7 tylli shnong ka Raid Sohkhwai u la ai jingmut iaka Sorkar ba haka jaka ban pyntrei iaka Eco Tourism Infrastructural Project hapdeng khlaw, kadei ban shu ker kynroh noh ia sawdong ka Nongkhyllem Wildlife Sanctuary ban iada naka jingwan kiew ki mrad shaki shnong bad kumjuh ban iada naka jingleit kyntur pud ki briew shaka Wildlife Sanctuary.
“Ngim kwah ban shu kren tang kumne hynrei haki sngi ban wan ngin sa leit kynduh iaki bor ba halor kynthup ki Myntri ba dei peit ban iakren bad iatai sani bha haba iadei bad ka Project Eco Tourism hapoh ka Nongkhyllem Wildlife Sanctuary” u la ong.
U Chairman ka Greentech Foundation u Bah HB Nongrang u la ong ba ka Foundation ka khlem wan sha Nongkhyllem ban pynbor iaki paidbah ban pyrshah ia ka Eco Tourism Infrastructural Project hynrei ka dei tang ban iaphylliew jingmut halor ka jingshah ktah lada pyntrei iaki project bapher bapher hapdeng ka khlaw jong ka Wildlife Sanctuary.
U Bah HB Nongrang u la iathuh ba ka sur ba mih naka jingialang hapdeng ki Rangbah Shnong bad Sordar jong ki 7 tylli ki shnong ka long ban nym pdiang iaka Project Eco Tourism.
 ba thmu pyntrei hapoh kane ka Sanctuary.){kind=link}