Nongstoin, Naitung 11 : Haduh 51 tylli ki Shnong ka thain Kyrshai kynthup ka Assam-Meghalaya Joint Protection Committee (AMJPC), kila pynpaw ia ka jingpyrshah kaba jur ban pyntrei ia ka Multi-Purpose Irrigation bad Hydroelectric Power Project ha wah Kulsi (Khri) bad pynpaw ba da lei lei ruh kin ym ailad ia ka Sorkar Assam ne Meghalaya ban pyniaid shakhmat ia ka project.
Kane ka project ka dei kaba la mynjur ban pyntreilang hapdeng ka Sorkar Assam bad Meghalaya bad ki Myntri Rangbah ki ar Jylla kila dep iakren pynbeit ia kane ka kam ha ka jingialang ba long dang shen ha Guwahati.
Ka Kulsi Project, kaba la wanrah ha u snem 1997, ka dei ka project pynpoi um sha ki jaka rep bad ka project pynmih bording ha ka Brahmaputra Basin, ka ban pynmyntoi ia ki jaka kiba don ha khappud ka Assam-Meghalaya. Kane ka project ka ban pynmih 55 MW bad ka ban pynpoi um sha ki 26000 hectare ki jaka rep, kala sahut namar ka jingiakajia pud bad ka jingpyrshah u paidbah.
Ki Nongialam ka AMJPC bad ki paidbah na ki 51 tylli ki Shnong Khasi, Garo bad Rabha jong ka thain Kyrshai, ba la lamkhmat da ka FKJGP Rambrai Circle, ha ka sngi Thohdieng, kila leit iakynduh ia u Deputy Commissioner ka West Khasi Hills Bah Garod LSN Dykes ban dawa ba ka Sorkar ka dei ban pynsangeh noh shisyndon ia ka jingthmu ban pyntrei ia kane ka project ha ryngkat bad ka Sorkar Assam.
U President ka AMJPC bah Albert Nonglang bad u Rajani Boro u nongïalam ba hakmat eh jong ki Boro bad Rabha, haba ïakren bad ki lad pathai khubor hadien ba ki la mih na kamra u Deputy Commissioner, ki la ong ba ki Myntri Rangbah ka Assam-Meghalaya ki la ïakut ba lada ka sorkar Meghalaya kan shah ïa ka Assam ban den ïa ka wah Khri, ia ka jingmih na katei ka dam yn ïa sam mar ryngkat kata 50% sha ka Assam bad 50% sha ka Meghalaya.
U bah Nonglang u la ong ruh ba haba ïoh jingtip ïa katei ka jingïakut, ki paitbah ka thaiñ naduh ki Khasi, Garo, Rabha bad Boro ki la khihwin biang namar ka jingsheptieng ïoh kin kylla phetwir bad kin duh noh ïa ki jaka ki puta, khamtam ïa ki jaka rep jaka riang, ki bri kwai bri tympew kiba dei ki païa bah kiba kyrshan ïa ka kamai kajih, ka ïoh ka kot bad kiwei kiwei.
U Rajani Boro u la ong ba naduh ba ki la tip ïa ka jingïakut jong ki Myntri Rangbah jong ki ar jylla, ki paidbah ki la duh thiah dem namar ki la khuslai ba lada katei ka jingthmu jong ki ar ngut ki Myntri Rangbah kan urlong, da ki phew hajar ki paidbah kin hap ban phetwir. U la iathuh ruh ba ka AMJPC kala dep ruh ban leit iakynduh ia u Deputy Commissioner jong ka Kamrup District.
Ia kane ka jingpyrshah ban tei ïa ka Kulsi project, la kyrshan ruh da ki sengbhalang kum ka FKJGP, KSU na Meghalaya bad na Assam pat la ai jingkyrshan pura da ka All Assam Student Union, All Rabha Student Union, Boro Student Union, Garo Student Union Kamrup district zone, Garo National Council Kamrup district, All Rabha National Council Kamrup district zone, Garo Women Council Kamrup district zone, Sixth Schedule Demand Committee Kamrup district, All Assam Bengalee Youth Student Federation Kamrup District Committee, All Rabha Sahitya Sabha Kamrup district, All Assam Gorkha Student Union Kamrup district, All Assam Koch Rajbanshi Student Union Kamrup district, All Assam Student Union Chaygaon Anchalok Committee, All Assam Tribal Sangha Bongaon Ancahlok Committee, Khilanjiya Adhikar Sangram Samittee Assam No Amata Unnayan Committee, Christian Forum Kamrup District Committee bad kiwei kiwei.
, kila pynpaw ia ka jingpyrshah kaba jur ban pyntrei ia ka Multi-Purpose Irrigation bad Hydroelectric Power Project ha wah Kulsi (Khri) bad pynpaw ba da lei lei ruh kin ym ailad ia ka Sorkar Assam ne Meghalaya ban pyniaid shakhmat ia ka project.){kind=link}