Nongstoin, Nailar 27 : Haduh 21 tylli ki Shnong jong ka Mawshynrut MDC constituency, kila pynpaw iaka jing pyrshah kaba jur ia ka jingpynkynriah jong ka Khasi Hills Autonomous District Council (KHADC) ia kine ki shnong sha ka Rambrai-Jyrngam constituency ha ka jingpynbeit thymmai ia ki constituency.
Kine ki 21 tylli ki Shnong ki dei kiba hap hapoh ki lai tylli ki Polling Station kaba kynthup ia ka Langdongdai Polling Station, ka Mawsmai Polling Station bad ka Misei Polling Station.
Ki Nongialam jong kine ki Shnong kila iakynduh lang hynne ka sngi Ba-ar ha Langdongdai bad kila thaw ia ka Joint Action Committee ki 3 Polling Station ha kaba la jied ia u Bah Jeremiia Dkhar kum u Chairman bad Bah Arful Mangsang kum u Secretary.
Kine ki Shnong kila pynpaw ia ka jingbym sngewtynnad ia ka jingleh jong ka KHADC ban pynkynriah iaki na kawei ka constituency sha kawei pat bad ong ba kane ka dei ka jingpynhap jubor ne leh donbor khlem ka jingmynjur lang jong u paidbah.
Lah ban kdew, ka KHADC ha ka 23 tarik Nailar, kala ai jingmynjur ia ka Bill jong ka Khasi Hills District ( Constitution of District Council) ( Amendment) Rules 2024, ba tyrwa ban pynbeit thymmai ia u pud u sam bad ki shnong ki thaw jong ki Constituency ka Council.
Kat kum kane ka Bill bala mynjur, haduh 19 tylli ki constituency kila shah ktah ha ka jingpynbeit thymmai ia u pud u sam bad haduh 260 tylli ki shnong la rah bad pynkynriah ia ki na kawei ka constituency sha kawei pat.
Haduh 30 tylli ki Shnong kiba hap ha Mawshynrut Constituency kila shah pynkynriah mynta sha Rambrai-Jyrngam constituency ha ka jingiapynbeit constituency thymmai jong ka KHADC.
Ka JAC jong kine ki Shnong kala shim ia ka rai ban leit iakynduh ia u Chief Executive Member (CEM) ka KHADC Bah Pyniaid Sing Syiem bad ia u Deputy CEM Bah Pynshngain N Syiem lashai ka sngi ban pynpaw ia ka jingpyrshah ia kane ka rai.
 ia kine ki shnong sha ka Rambrai-Jyrngam constituency ha ka jingpynbeit thymmai ia ki constituency.){kind=link}