Shillong, Jylliew 20 : Ka Ri-Bhoi Youth Welfare Organisation (RBYWO) kala pynpaw ia ka jingpyrshah kaba jur halor ka jing pan jaka jong ka Invest Meghalaya Authority (IMA) na ka Tnad Agriculture bad Soil & Water Conservation, kaba heh haduh 137 acre ha 13 Mer, Ri-Bhoi District ban pynkylla kum ka Industrial Estate.
Ka RBYWO lyngba u President Bah Ban Kharnaior bad Asst Secretary samla Gary Lyndem, kila phah da ka dorkhas sha ka Myntri ka Tnad Agriculture & Farmers Welfare lem bad sha u Director ka Soil & Water Conservation, ba dawa ba dei ban pynsangeh ia ka jingthmu ai ia kane ka jaka sha ka IMA.
“Ka Ri-Bhoi District kala don lypa artylli ki EPIP-kawei ha Umiam bad kawei ha Byrni bad jan spah tyli ki karkhana kila don ha kine ki EPIP. Ki don ki karkhana ba ai jingmyntoi bad don ki bym ai jingmyntoi ia ki paidbah ka Jylla nalor ka jingpynjulor ia ka mariang kaba ktah ia ka koit ka khiah ki padbah jong ki shnong ba marjan” ong ka RBYWO.
Kala ong, ka Tnad Agriculture kaba ialeh ban kyntiew ia ki nongrep bad ka rep ka riang bad ka Tnad Soil & Water Conser-vation kaba ialeh ban pynneh pynsah ia ka khyndew ka shyiap bad ki wah, ki dei ban sangeh shisyndon ban ai ia ka jaka jong ka Tnad sha ka IMA katba ym pat lah ban pynshai thikna ia ki paidbah ka Ri-bhoi.
Ka RBYWO kala pyntip ba kala pan mynta ia ki jingtip kiba bniah lyngba ka Right to Information (RTI) na ka Ophis jong ka Invest Meghalaya Authority (IMA).
“Ngi kwah ba kine ki Tnad Sorkar kin pynsangeh ia ka jingthmu ai ia katei ka jaka sha ka IMA namar ngi kwah ba ka dong Ri-Bhoi kan jyrngam biang ym ban pyndap da ka jingpynmih tdem ba long buh” kila ong.
