Shillong, K’lyngkot 07 : U National President ka National People’s Party (NPP) bad Myntri Rangbah ka Jylla Conrad K Sangma hynne ka sngi saitjain, ula ong ba ka Uniform Civil Code (UCC) ka dei kaei kaei kaba ym lah satia ban pdiang da ka NPP.
“Kum ka Political Party, ngi la kren shai bha ba ka UCC ka dei kaei kaei ka bym lah satia ban pdiang da ka NPP” ong u Conrad haba iakren bad ki nongthoh khubor haba jubab ia ka jingkylli halor kane ka kam.
Hynrei ula ong ba kane ka UCC Bill ka dei ka Private Member Bill bad kam dei satia ka Bill bala wanrah da ka Sorkar bad namar kata, kam don satia ka jingtip kaba thikna ba la wanrah ia kane ka Bill.
U Conrad ula kubur baka UCC bad ka rukom long jong ka, kan sa ktah jur bha ia ka deiriti bad ka rukom im jong ki paid riewlum ka thain Shatei Lam Mihngi khamtam hapdeng ki Jaidbynriew ba ai jait sha ka Kmie kum ha Jylla Meghalaya.
Ula kdew ba “Ki lah ban don katto katne ki bynta kiba ka Sorkar Pdeng ka kwah ban leh, ki don ruh katto katne ki jingsngewkhia ia kiba ngim tip satia hynrei kaei kaba jia kam dei ka ktah ia ka deiriti bad ka rukom im jong ki paid nongshongshnong ka Meghalaya”.
U Conrad ula bteng “Ka UCC ka mut ba kumno ia ka nongkynti yn ai pateng sha ki Khun, lada ka UCC ka ong ba ki nongkynti kin hap leit sha ki Khun shynrang ba nyngkong kumba long ha kiwei pat ki bynta jong ka Ri, kane kam iahap satia bad ka deiriti jong ngi ha Jylla ha kaba bun ki jaidbynriew riewlum ki ai pateng sha ki Khun kynthei ba Khatduh”.
Namar kata, kum kine ki kyndon ki don ha ka Bill bad ki donkam ban hap iatai bniah bad namar kata, ngim tip ba kum kano ka Bill kan wan lada wanrah da ka Sorkar. Ngim lah ban ong eiei ia mynta khlem da iohi shuwa ia ka Bill.
