Shillong, Naitung 24 : Ka Meghalaya and Greater Shillong Progressive Hawkers and Street Vendors Association (MGSPHSVA) kala pynpaw ia ka jingsngew pyrshah kaba jur halor ka rukom pyniaid ka Sorkar ia ka jingpynkynriah jaka ia ki nongdie dukan madan ha Khyndailad.
Katkum ka jingong jong katei ka seng, ka sorkar ka la pynkhein ia ki jingiada bad ki kyndon ba la buh da ka ain da ka Street Vendors (Protection of Livelihood and Regulation) Act 2014.
Ha ka kyrwoh ba pyllait ha ka sngi Palei, ka MGSPHSVA kala kynnoh ruh ba ka Sorkar kam shym la khein snep iaki jingbthah ka Iingkashari ha ka jingpynkynriah jaka ia ki nongdie dukan madan ha Shillong.
Watla ka hukum jong ka Iingkashari ba thung ia u Special Officer ban khmih ia ka jingshim rai ia ki nongdie dukan madan ba dei hok ban ioh jingithuh bad ka jingpyrrkhing ia ka por ban shong dukan madan, la kynnoh ba ki bor ka Municipal kila pyniaid shakhmat ban sam ia ki dukan khlem da pynthikna ia ka thup jong ki nongshong dukan madan kiba dei hok ban ioh bynta.
Kala kynnoh ba bun ki nongshong dukan madan ba dei hok ban ioh bynta ki dang shah ieh shadien, katba kito kiba don ia ki dukan lane shong dukan madan ha bun jaka, kila shah kynthup ha ka thup haba bynrap ba ka rukom ai ia ki dukan la leh lyngba ka lottery system khlem ka jingpynbiang ia ki kot ki sla, kaba lam sha ka kynrum kynram kaba jur.
Haba kynnoh ruh ia ka jingtreikam ka bym shai ha ka rukom sam ia ki dukan, ka MGSPHSVA kala kam ba ka survey bala pynlong ha baroh kawei ka Nongbah kala ithuh haduh 1400 ngut ki nongshong dukan madan hynrei ia ka thup ym shym la pynmih paidbah tad haduh ka 16 tarik Naitung, 2025, hadien bala rah iakren ha ka jingialang bad u Special Officer bala thung da ka Iingkashari Meghalaya High Court.
Kala kynnoh ruh ia ka jingkyntait ia kiba bun da kaba ong b aka thup ki 760 ngut ki nongshong dukan ba dei ioh bynta la pynbna khlem da pyniaid ia ka lynti ban bishar ha ka jingiakam bad iapyrshah, bad iehnoh ia 640 ngut khlem kano kano ka daw.
“Ka SMB kala sdang ban shna ia ki dukan khlem ka jingiasyllok lane shim rai hapoh ka Provisional Town Vending Committee (PTVC), kaba pynbor ia ka seng ban buh jingkylli bad dawa ia ka jingtreikam kaba shai” kala bynrap.
Ha kajuh ka por, ka MGSPHSVA kala tyrwa ruh ia katto katne ki kyndon na ka bynta ban pynshong dukan ia ki nongdie dukan madan ha ki jaka bala ai jingithuh.
Ka ong ba ka jaka ha shilynter naduh Khyndai Lad haduh Lad Umsohsun dei ban ithuh noh tang kum ka lynti iaid paidbah, khlem da shah ban pynieng kali kynthup ia ki saw shaka ne ar shaka.
Ki trai dukan ha ka thain kim dei ban thad ia ki mar ki mata jong ki ha surok lane pyndonkam ia ki verandah ba kin die jingdie.
Ka jingpynshong dukan madan biang ka dei ban long hadien ba ki nongshong dukan madan ba ioh bynta, kila ioh ia ka Certificate of Vending, ka ban iarap ban pynthikna ia ka jingdon ki nongshong dukan madan ha ka thain.
Ki nongdie dukan madan kum kiba die jain, pla, bad ki tiar electronics dei ban pynkynriah ia ki sha ki jaka bala ithuh, kum ha ka MUDA Parking Lot bad kiwei kiwei.
 kala pynpaw ia ka jingsngew pyrshah kaba jur halor ka rukom pyniaid ka Sorkar ia ka jingpynkynriah jaka ia ki nongdie dukan madan ha Khyndailad.){kind=link}